Sonymen qatar, «pılottyq» rejımdi uzartýdan basqa qabyldanǵan qaýly sheńberinde 2020 jyldyń 1 qańtarynan bastap engizilgen basqa da birqatar jańalyqtar bar.
Atap aıtqanda, «Atameken» QR UKP men tıisti áýejaılardyń basqarýshy kompanııalarynyń birneshe ótinishterine saı, sondaı-aq QHR men Úndistannyń birqatar týrıstik kompanııalarynyń «Uly Jibek Joly» boıynda ornalasqan qalalarǵa arnaıy týrıstik baǵdarlamaǵa joǵary qyzyǵýshylyq tanytýyna baılanysty, atalǵan tranzıttik rejım sheńberinde jumys isteıtin halyqaralyq áýejaılardyń tizimi 4 qalanyń áýejaılarymen tolyqtyrylǵan. Olar – Shymkent, Aqtaý, Qaraǵandy jáne Taraz qalalary.
Budan basqa, osy vızasyz rejım sheńberinde qyzmetti júzege asyrý jáne tıisti tranzıttik tasymaldardy jasaý quqyǵy memleket ıeligine qaramastan qazaqstandyq jáne sheteldik barlyq áýekompanııalaryna beriledi.
Sonymen qatar, osy rejım sheńberinde keletin Úndistan men QHR azamattaryna kóshi-qon kartochkalaryn berý qajettiligi alynyp tastaldy. Onyń ornyna, 2020 jyldyń 1 qańtarynan bastap ótkizý beketterinde Qazaqstan Respýblıkasynyń Memlekettik shekarasyn kesip ótý ýaqyty kórsetile otyryp, Úndistan men QHR tranzıttik azamattarynyń pasporttaryna mórtabandar qoıylady.
Osy sharalardyń barlyǵy tranzıttik jolaýshylarǵa ishki týrızmdi damytý jáne jyljytýda óz qyzmetin júzege asyratyn qazaqstandyq týroperatorlardan qosymsha týrpaketter satyp alýǵa múmkindik beredi. Bul óz kezeginde Qazaqstan ekonomıkasyna shetel valıýtasynyń qosymsha aǵymyn qamtamasyz etedi.
