Qazaqstan bastamasy jalǵasyn tapty

BUU Qaýipsizdik Keńesine jańa turaq­ty emes múshelerdiń jumys bastalýy­nyń saltanatty rásimin ótkizý dástúri Qazaq­stannyń bastamasymen 2018 jyldyń qań­tarynda onyń BUU Qaýipsizdik Keńesinde tóra­ǵalyǵy kezinde engizildi. BUU-ǵa múshe mem­leketter osy jańa bastamany Qazaq­stan­nyń «jarqyn jeke kartochkasy» dep atady.

«Qazaqstannyń bastamasymen BUU qurylǵan sátten bastap 75 jyl ishinde úshinshi ret ótkizilip otyrǵan bul rásimniń maqsaty – halyqaralyq qoǵamdastyqtyń sizderge júktelgen jahandyq beıbitshilik pen qaýipsizdikti saqtaýdyń mańyzdy jáne qasıetti mindetin oryndaýǵa berilgen mandatty moıyndaý. Sizderdiń elderińizdiń Qaýipsizdik Keńesine saılanýy basqa 192 múshe memlekettiń sizdiń úkimetterińizge BUU Jarǵysynyń murattaryn, ásirese osy qıyn-qystaý kúnderde senetindigin aıǵaqtaıdy», dedi is-sharany bastaý barysynda Qazaqstannyń BUU janyndaǵy Turaqty ókili Qaırat Omarov.

Ol Keńestiń jańa turaqty emes múshelerine osy dúnıejúzilik uıymnyń 75 jyldyq mereıtoıyna oraı bıylǵy mereıtoılyq jyly sáttilik pen mańyzdy jetistikter tiledi.

Aıta keteıik, BUU Qaýipsizdik Keńesi­­niń jańa turaqty emes músheleri retinde Vetnam, Estonııa, Týnıs, Sent-Vın­sent jáne Grenadınder, sondaı-aq Nıger Respýblıkasy keldi. Rásimge BUU Qaýip­sizdik Keńesiniń jańa turaqty emes múshe­leriniń elshileri qatysty. Olar Keńes­tegi jumysynyń basym­dyqtary týraly qysqasha baıandama jasap, BUU-nyń osy negizgi organynda sal­tanat­ty jaǵdaıda jumysqa kirisýge múm­kin­dik bergen is-sharany uıymdastyrǵany úshin Qazaqstanǵa úlken rızashylyq bildirdi.

Qazaqstannyń bastamasynan buryn Qaýip­sizdik Keńesiniń zaly aldyndaǵy baspa­sóz qabyrǵasynyń janynda BUU Qaýipsizdik Keńesi turaqty emes múshe­le­riniń týlaryn aýystyrýy rásimi boldy. Jańa dástúrdi engizýimen bul rásim BUU-ǵa múshe memleketterdiń jáne álemniń jetekshi buqaralyq aqparat quraldary ókilderiniń keńinen qatysýymen Keńestiń jyl saıynǵy baǵdarlamasynyń birinshi jumys kúnindegi resmı is-sharaǵa aınaldy.

2019 jyly qańtarda Qazaqstannyń Tu­raq­ty ókildigi BUU Qaýipsizdik Keńesi múshe­leriniń týlary úshin Qazaqstanda jasal­ǵan jáne qazaqtyń ulttyq oıýlarymen bezendirilgen arnaıy tuǵyrlar syılady.

Qazaqstan BUU Qaýipsizdik Keńesinde ekijyldyq jumysyn 2018 jylǵy 31 jel­toq­sanda aıaqtaǵan.