Kórme 2025 jylǵy 12 jeltoqsannan 2026 jylǵy 30 qyrkúıekke deıin ótedi. Uıymdastyrýshylar demokratııany tek basqarý júıesi retinde emes, ony qorǵaýdy talap etetin qoǵamdyq sana men jaýapkershilik retinde qarastyrýdy usynady. Ekspozısııa kelýshini belgili bir saıası ustanymǵa ıtermelemeı, derek pen adam taǵdyry arqyly oılanýǵa jeteleıdi.
Kórmede Venesýelanyń demokratııalyq memleketten avtorıtarlyq basqarýǵa kóshý joly aıqyn kórsetilgen. Bul úderis Nobel beıbitshilik syılyǵynyń laýreaty, venesýelalyq saıasatker Marııa Korına Machado júrgizgen kúrespen sabaqtastyryla baıandalady. Ekspozısııada onyń eldegi saıası ózgerister úshin atqarǵan qajyrly eńbegi jeke jeli retinde usynylǵan.
Venesýela búginde álemdegi eń repressıvti rejımderdiń biri retinde atalady. 2014 jyldan beri elden 8 mıllıonnan astam adam kóship ketken, bul halyqtyń shamamen tórtten bir bóligi. Elde qalǵan turǵyndar kedeılik pen turaqsyzdyq jaǵdaıynda ómir súrip, shetelge ketken jaqyndaryn saǵynady.
Kórmeniń mańyzdy bóligi – bosqynǵa aınalǵan venesýelalyq jastardyń taǵdyry. Magnum agenttiginiń fotografy Emin Özmen Kolýmbııada turyp jatqan jas venesýelalyqtarmen júrgizgen suhbattary men fotosýretteri arqyly «joǵalǵan urpaqtyń» bolmysyn ashady. Onyń aıtýynsha, «bul jastar óz elinde bolashaq kórmeıdi, biraq óz ómirinen úmit úzbegendikten ketýge májbúr».
Ekspozısııa demokratııanyń taǵdyry azamattardyń sergektigi men ony qorǵaýǵa degen daıyndyǵyna tikeleı baılanysty ekenin ańǵartady. Uıymdastyrýshylardyń ustanymynsha, demokratııany saqtaý – tek memleketterdiń emes, árbir qoǵam múshesiniń ortaq mindeti.
NRK telearnasynyń óner jáne sáýlet synshysy Mona Pale Berke kórmeniń mazmundyq tepe-teńdigin joǵary baǵalady.
«Bıylǵy Nobel kórmesi jınaqy ári kórkem. Maǵan onyń kelýshini belgili bir tarapty tańdaýǵa úgittemeıtini unady», dep pikir bildirdi ol.
Osylaısha, Nobel beıbitshilik syılyǵy aıasyndaǵy bul kórme Venesýela taǵdyry arqyly demokratııanyń qazirgi álemdegi osal tustaryn kórsetip, ony qorǵaý máselesiniń barshaǵa ortaq ekenin eske salady.
