Foto: atameken.kz
Kedendik talaptardaǵy kedergiler
Otyrysta eń aldymen dárilik zattardy elge ákelý kezindegi júıeli qıyndyqtar sóz boldy. «Atameken» ulttyq kásipkerler palatasy tóraǵasynyń orynbasary Tımýr Jarkenov bıznestiń búginde zańsyz tap bolǵanyn atap ótti. Onyń aıtýynsha, keden organdary mindetti áleýmettik medısınalyq saqtandyrý men tegin medısınalyq kómektiń kepildik berilgen kólemi aıasynda jetkiziletin dárilerdi qosa alǵanda, preparattardyń nysanaly maqsatyn rastaýdy talap ete bastaǵan.
«Mundaı tájirıbe qoldanystaǵy erejelerdi keńeıte túsindirý bolyp tabylady jáne ákelinetin barlyq dárilik zattar sanatyna birdeı qoldanylmaıdy», dedi Tımýr Jarkenov.
Osyǵan jaýap retinde Memlekettik kirister komıteti tóraǵasynyń orynbasary Jánibek Nurjanov barlyq dárilik zattardy ımporttaý kezinde negizgi talaptar bar ekenin túsindirdi. Atap aıtqanda, farmasevtıkalyq nemese medısınalyq qyzmetke lısenzııanyń bolýy, memlekettik tapsyrys aıasynda jetkiziletin preparattar úshin tıisti sharttardyń jasalýy jáne jetkizýshiniń taýardy maqsatty paıdalaný jónindegi mindettemeleri qajet.
Sonymen birge nysanaly maqsatyn rastaý talaby tek dárilik sýbstansııalar men óndiriste qoldanylatyn balk-ónimderge qatysty ekeni naqtylandy. Al daıyn dáriler úshin standartty qujattar paketi jetkilikti.
Talqylaý qorytyndysynda erejelerge ózgerister engizý jáne kedenniń aýmaqtyq bólimshelerine jedel nusqaýlyqtar joldaý týraly sheshim qabyldandy.
Dári-dármekter men medısınalyq qyzmetterdiń tizbesi QQS-tan bosatyldy
QQS jáne dári-dármek qoljetimdiligi
Kún tártibindegi ekinshi mańyzdy másele – salyqtyq jeńildikter. Belgili bolǵandaı, keıbir dárihanalar sırek kezdesetin jáne áleýmettik mańyzy bar aýrýlardy emdeýge arnalǵan preparattardy satyp alýdan bas tartyp otyr. Buǵan jetkizýshilerdiń 5 jáne 16 paıyzdyq mólsherlemelerdi qoldanýy sebep. Zań boıynsha mundaı dáriler barlyq ótkizý kezeńderinde qosylǵan qun salyǵynan bosatylýǵa tıis.
«Atameken» UKP bastamasymen bul olqylyqty joıý úshin Medısınalyq jáne farmasevtıkalyq baqylaý komıteti Memlekettik kirister komıtetimen birlesip, qysqa merzimde ortaq ustanym ázirleıtin boldy. Bul sheshim jeńildikke jatatyn preparattardy qaıtadan keń saýdaǵa shyǵarýǵa múmkindik bermek.
Sondaı-aq otyrysta baǵa qalyptastyrý tártibi de naqtylandy. Salyq tóleýshiniń shekti baǵadan tys QQS esepteýge quqyǵy resmı túrde bekitildi. Sebebi shekti baǵa – tek eń joǵary ruqsat etilgen deńgeı, al naqty satý baǵasy salyq zańnamasyna sáıkes qalyptasady.
Bıznestiń beıimdelýi jalǵasyp jatyr
Jańa normalarǵa beıimdelý úderisi áli de júrip jatyr. Sońǵy aptada ýákiletti organdarǵa 16,1 myń ótinish túsken. Bul kórsetkish joǵary bolǵanymen, oń dınamıka baıqalady: aldyńǵy kezeńmen salystyrǵanda suraqtar sany 3,4 myńǵa azaıǵan. О́tinishterdiń basym bóligi ákimshilendirý máselelerine qatysty.
Otyrysta qaralǵan barlyq keıster jýyrda resmı resýrstarda túsindirme retinde jarııalanyp, kásipkerlerge naqty baǵyt-baǵdar berilmek.
Mınıstrlik dári-dármek saýdasyna qatysty jaǵymdy jańalyq jarııalady
