Memlekettik kirister komıtetiniń bereshekpen jumys basqarmasynyń basshysy Qaısar Aryn Instagram jelisindegi tikeleı efır barysynda túsindirgendeı, eger salyqtyq bereshek 20 aılyq eseptik kórsetkishten (86 500 teńge) assa, aldymen ósimpul eseptelip, salyq tóleýshige habarlama joldanady. Belgilengen merzimde qaryz ótelmegen jaǵdaıda ǵana banktik shottar boıynsha shyǵys operasııalary ýaqytsha toqtatylady, sondaı-aq kassa men ınkassolyq ókimderge shekteý qoıylady.
Al 20 AEK-ke deıingi bereshek kezinde qatań sharalar qoldanylmaıdy. Bul jaǵdaıda tek habarlama jiberilip, ósimpul esepteledi.
Komıtet deregine súıensek, 2025 jylǵy 1 jeltoqsandaǵy jaǵdaı boıynsha 20 AEK-ke deıingi qaryzy bar shamamen 100 myń adam tirkelgen. Olardyń jalpy bereshek somasy 1,4 mlrd teńgeni quraıdy.
Al 20-dan 45 AEK-ke deıingi (194,6 myń teńgege deıin) bereshek kezinde salyq organdary banktik shottar men kassadaǵy shyǵys operasııalaryn toqtatyp, ınkassolyq ókimder resimdeıdi. Mundaı qaryzy bar 14 313 salyq tóleýshi anyqtalǵan, jalpy soma – 1,8 mlrd teńge.
Bereshek 45 AEK-ten asqan jaǵdaıda, múlikti satý, debıtorlar arqyly óndirip alý tetikteri iske qosylady. Bul sanatqa 56 784 tulǵa jatady, olardyń jıyntyq qaryzy 276,5 mlrd teńge.
Al eń qatań shara – elden shyǵýǵa tyıym salý – bereshek 27 myń AEK-ten (116,8 mln teńge) asqanda qoldanylady. Qazir mundaı iri qaryzy bar 637 salyq tóleýshi bar, olardyń jalpy bereshegi 827,2 mlrd teńgeni quraıdy.
Taksı qyzmeti: Salyq kodeksi júrgizýshilerge qalaı áser etedi?
Memlekettik kirister komıteti jańa júıe shaǵyn salyq bereshegi úshin búkil kásipkerlik qyzmettiń toqtap qalýyna jol bermeýdi kózdeıtinin birneshe ret atap ótken. Jańa tásil salyqtyq tártipti kúsheıte otyryp, ekonomıkalyq belsendilikke artyq qysym jasamaýǵa baǵyttalǵan.
