..maqtan tutady

Eńbek etkenniń eńsesi bıik

Tórt túlik ósirip, ata-baba kásibin damytýǵa erekshe den qoıǵan Moldekenovter otbasy bul kúnderi óz kásibin dóńgeletip otyr.

Jomart Moldekenov aǵaıyn-týystarymen birge О́zbekstannan Aıyrtaý aýdanyna qonys aýdarǵan. Bul óńir mal sharýashylyǵymen aınalysýǵa óte qolaıly. Aýylǵa kóshken otbasy bastapqyda 30 bas mal satyp alǵan. Jyl ótken saıyn mal basy kóbeıip, tabys molaıa túsken.

«Iri qaranyń tuqymyn jaqsartpaı, joǵary ónim alamyn deý – bos áýreshilik», deıdi malsaq jan. Sóıtip asyl tuqymdy iri qara malyn ósirýmen aınalysady. Bul maqsatyn júzege asyrý úshin memlekettik baǵdarlamalardyń kómegine súıenedi. 2012 jyly «Bız­nestiń jol kartasy-2020» baǵdarlamasynyń ekinshi baǵyty boıynsha bilim alǵannan keıin Aýyl sharýashylyǵyn qarjylaı qol­daý qory arqyly nesıe rásimdegen. Bul qarajatqa 13 bas mal satyp alǵan.

Qazirgi ýaqytta Jomarttyń sharýa qojalyǵynda 120 sıyr, 40-tan astam qoı bar. Onyń sózine qaraǵanda, aýyl tirshiligi qaýyrt, tańnyń atysynan kúnniń batysyna deıin tynym joq. Eńbek etkenniń eńsesi bıik. Mal ustap, kásibin dóńgeletemin degenderge jol ashyq. Byltyr taǵy 10 mıllıon teńge nesıe rásimdegen. Oǵan jańa mal qorasyn turǵyzyp, elektr jelisin tartqan. Jaqyn jerden qudyq qazyp alǵan. Beıbarys, Aqjol esimdi uldary da ákelerine qolǵanat. Zaıyby Oksana Túlekova – til úıirer dámdi qaımaq, maı, irimshik, qurt daıyndaýdyń besaspap sheberi. О́nimderdi aýdan, oblys turǵyndaryna ótkizedi.

«Aýylda jumys joq» degen áńgime – jatypisher jalqaýdyń syltaýy ǵana. Erinbeı, jalyqpaı eńbek etken adamǵa qaı jerde de kásip te, násip te bar, deıdi Jomart Moldekenov.

Qanat ATAMANOV

Soltústik Qazaqstan oblysy

...talap etedi

Eskertkishterge mán bereıik

Osy maqalany jazýyma myna jaǵdaı túrtki boldy. Birde Nur-Sultan qalasynda ótken bir jıynǵa qatysyp, onda ártúrli taqy­rypta sóz qozǵaldy. Sonda bir azamat Qazaqstan qalalaryndaǵy eskertkishter týraly aıta kelip: «Arqalyq qalasyndaǵy murajaı aldynda turǵan Lenın eskertkishin urlap ketpesin dep, janyna Keıki batyrdyń eskertkishin ornalastyrypty. Bir kórgende, quddy Lenındi Keıki babamyz qorǵap turǵandaı kórinedi eken», dedi. Keıki atamyz – qazaq ulty úshin kúresken, azattyq úshin basyn báıgege tikken batyr. Biraq solaqaı saıasattyń kesirinen «halyq jaýy» atanyp, atylyp ketti.

 Arqalyq qana emes, Qazaqstannyń túkpir-túkpirinen áli de Lenınniń, qaptaǵan komıssarlar men revolıýsıonerlerdiń, bolshevıkterdiń eskertkishterin kezdestiremiz. Bulardy demalys oryndary men qala ortalyqtarynan da kórýge bolady. Táýelsizdik alǵanymyzǵa kóp ótse de, áli de sol adamdardyń eskertkishterinen aryla almaı kelemiz. Solardyń ornyna eskerýsiz qalyp jatqan batyr babalarymyzdyń músinin nege oıyp turyp qoımasqa? Osy máseleni shuǵyl qolǵa alatyn kez kelgen sııaqty.

Serik BALTABEKULY

Arqalyq qalasy

...qoldaý bildiredi

«Adaldyq saǵaty» aksııasy

Shetpedegi Mańǵystaý tehnıkalyq kolledjinde jalpyrespýb­lıkalyq «Adaldyq saǵaty» aksııasy ótti. Aksııa aıasynda ótken sharaǵa Mańǵystaý aýdandyq jastar ortalyǵynyń basshysy Alla­bergen Qonarbaev, kolledj dırektory Berik Amanııazov, kolledj psıhology Altyngúl Jylqyshıeva jáne ustazdar men stýdentter qatysty.

Jıynda kolledj basshysy Berik Bolatuly stýdentterge sybaılas jemqorlyqty joıý, sondaı-aq bilim salasyndaǵy jem­qorlyqtyń aldyn alý sharalary týraly oıyn ortaǵa saldy. «Sybaılas jemqorlyq – zamanmen birge ósip-órkendep, nebir te­geýrindi qarsylyqtarǵa tó­tep berip, qaıda mol qarajat, paıda bolsa, sol jerge tamyr jaıyp, búginge deıin joıylmaı otyr­ǵan qaýipti keseldiń biri. Respýb­lıkamyzdyń Tuńǵysh Prezı­denti N.Á.Nazarbaev halyqqa arnaǵan Joldaýynda ulttyq qaýip­siz­dik pen qoǵamdyq turaqtylyqqa tóngen qater retinde sybaılas jemqorlyqqa qarsy kúres jónindegi jalpyulttyq keshendi baǵ­dar­lamany dáıekti túrde júzege asyrýdyń qajettigin aıtyp, jemqorlyqqa qarsy kúres jalpy barsha halyqtyń boryshy ekenin atap kórsetti. Sondyqtan búgingi kúnniń ózekti taqyryby kún tártibinen túspek emes», dedi Berik Bolatuly.

Al jastar ortalyǵynyń basshysy A.Qonarbaev Elbasynyń qatysýymen ótken «Nur Otan» partııasy saıası keńesindegi máse­lelerdi alǵa tarta kele: «Sybaılas jemqorlyq sylyp tastaıtyn syrtqy jara emes, bul tamyryn tereńge jaıǵan, ózge saý aǵzalaryn shyrmap, tynys-tirshiligin taryltatyn, sóıtip olardyń tolyqqandy qyzmet etýine qater tóndiretin qaýipti kesel. Ony emdemes buryn aýrýdyń paıda bolý, damý, taralý joldaryn bilip, derttiń qozýyna qolaıly jaǵdaı týýyna jol bermeý kerek. Ol úshin bul aýrýǵa qoǵam bolyp qarsy turýymyz qajet», degen tujyrym jasady.

Shara sońynda stýdent jastar saýaldaryn qoıyp, naqty jaýaptaryn aldy.

Aıdana AMANGELDIQYZY,

Mańǵystaý aýdandyq jastar ortalyǵynyń mamany

Mańǵystaý oblysy,

Mańǵystaý aýdany