Financial Times basylymy taratqan málimetke sáıkes, mámile shamamen 1,4 mlrd dollar kóleminde baǵalanyp otyr. Aqparatqa qaraǵanda, satyp alýdy qarjylandyrý úshin Glencore bolashaqta jetkiziletin ferrohromǵa aldyn ala 800 mln dollar avans berýge daıyn. Ferrohrom negizinen tot baspaıtyn bolat óndirýde qoldanylatyn mańyzdy shıkizat sanalady.
Financial Times dereginshe, ERG úlesin satyp alýǵa qatysty Mútáliptiń usynysy kompanııanyń bas dırektory, kásipker Shýhrat Ibragımovtyń ótinimine qaraǵanda anaǵurlym tartymdy dep baǵalanǵan. Shýhrat Ibragımov – kompanııanyń negizin qalaýshylardyń biri marqum Alıdjan Ibragımovtyń uly.
Sonymen qatar Mútálip pen Glencore arasynda taǵy bir iri mámile talqylanyp jatyr. Áńgime Glencore-ǵa tıesili qazaqstandyq «Qazsınk» kompanııasynyń 70,2% aksııasyn satyp alý múmkindigi jóninde. Aldyn ala baǵalaý boıynsha bul kelisimniń quny shamamen 3,5 mlrd dollar bolýy yqtımal.
Osylaısha, eki mámileniń jalpy kólemi 5 mlrd dollarǵa jýyqtaýy múmkin. Soǵan qaramastan Glencore uzaq merzimdi kelisimder arqyly metall shıkizatyna qoljetimdiligin saqtap qalmaq.
Ekonomıst ári Finmentor Telegram-arnasynyń avtory Arman Bataevtyń esepteýinshe, Eurasian Resources Group-tyń Qazaqstandaǵy negizgi aktıvteri 2024 jyldyń qorytyndysynda shamamen 23 mlrd teńge shyǵynǵa ushyraǵan. Al 2023 jyly kompanııa 135 mlrd teńge kóleminde taza paıda tapqan edi.
Buǵan deıin qazaqstandyq kásipker Shahmurat Mútálip ERG-diń 40% úlesin 1,4 mlrd dollarǵa satyp alýdy usynǵany habarlanǵan. Bul úles qazir kompanııanyń teń quryltaıshylarynyń biri Patoh Shodıevke jáne 2025 jyly ómirden ótken kásipker Aleksandr Mashkevıchtiń muragerlerine tıesili.
Qazirgi ýaqytta Eurasian Resources Group aksıonerleriniń qurylymy mynadaı: Qazaqstannyń Qarjy mınıstrligi – 40%, Mashkevıchtiń muragerleri men Ibragımovtar otbasy – árqaısysy 20,7%-dan, Patoh Shodıev – 18,6%. Forbes deregi boıynsha, Ibragımovtar otbasy 2,06 mlrd dollarlyq baılyǵymen Qazaqstandaǵy eń aýqatty adamdar tiziminde 7-orynda tur.
ERG, KIA, Mars: Qazaqstanda ónerkásip lokalızasııasy ósip keledi
ERG-diń negizin qalaǵan kásipkerler Aleksandr Mashkevıch, Patoh Shodıev jáne Alıdjan Ibragımov 2005 jyly Forbes baǵalaýynsha Qazaqstandaǵy alǵashqy dollarlyq mıllıarderler qataryna engen edi. Olardyń árqaısysynyń sol kezdegi kapıtaly shamamen 1 mlrd dollar dep baǵalanǵan.
