Aqqaıyń aýdanyndaǵy Daıyndyq aýyly bir kezde barlyq aýyldar sekildi ótken ǵasyrdyń aıaǵyndaǵy ekonomıkalyq quldyraýdy basynan keship, taraýǵa aınalyp qalǵan. Sol kezde qolynan is keletin Birjan Shaımerdenov qaladaǵy úsh bólmeli úıin satyp, týǵan aýylyn kóterýge kelgen edi. Sodan beri tynym tappaı eńbektengendiginiń arqasynda qazir oblystaǵy ozyq sharýashylyqtardyń birine aınaldy. Onyń aýyl turǵyndaryn áleýmettik turǵydan qoldaý jóninde jasaǵan isterin sanap shyǵýdyń ózi uzaq áńgimege júk bolar edi.
Qazir onyń fermasynda 600 bas sımmental tuqymdy sútti sıyrlary bar. Olardyń árqaısysy táýligine 17-18 lıtrden sút beredi eken. «Daıyndyq agro» asyl tuqymdy maldy Aýstrııadan satyp alypty. Qazir sıyrdyń sýalatyn mezgili, soǵan qaramaı táýligine bes tonnadaı sút alady. Al sút fermasyn seriktestik byltyr tórt aıdyń ishinde salyp bitirgen. Oǵan jumsalǵan 1,2 mlrd teńge seriktestiktiń jeke qarajaty.
– Asyl tuqymdy ár sıyrdy satyp alýǵa memleketten 137 myń, al jem-azyq alýǵa 120 myń teńge sýbsıdııa aldym, – deıdi Birjan Shaımerdenov.
Jańa fermanyń jumysymen oblys basshysy Qumar Aqsaqalov tanysty. Zamanaýı ferma sońǵy úlgidegi tehnıkamen jabdyqtalǵan. Qazir onda 28 turaqty jumys orny ashyldy. Jalpy aıtqanda osy aýyldyń turǵyndary jyl boıy jumyspen qamtylǵan.
Al oblysta osyndaı 3 zamanaýı sút kesheni iske qosylady. Aldyńǵy jyly tórteýi ashylǵan. 2020 jyly taǵy 10 keshenniń qurylysy bastalmaq. Jańa fermalar sút óndirisin jylyna 20 myń tonnaǵa kóbeıtýge múmkindik beredi.
«Mal sharýashylyǵy – óte tabysty bıznes, ásirese sút óndirisi. Osy kásippen aınalysyp otyrǵandar paıdasyn kórip otyr. Qazir biz atalǵan fermalardyń sanyn kóbeıtý sharýalary boıynsha tıisti jumystardy júrgizip jatyrmyz», dedi Qumar Aqsaqalov.
Soltústik Qazaqstan oblysy
