Byltyr jyl sońynda ot jaǵyp, kúl shyǵarý beınetinen qutylǵan aýyldar – Taldyapan aýyldyq okrýgine qarasty Taldyapan, Qosoba, Qaıshaqudyq, Saryqudyq jáne Qaraózen aýyldyq okrýgine qarasty Serik aýyldary. Oǵan Kómekshi, Kókterek, Orazǵalı, Juldyz aýyldary da qosylmaq. Buǵan qosa, Kishkeneshal, Taldyqudyq, Kishitaldyqudyq, Beıisterek aýyldaryna da gaz qubyryn tartý jumystary bastalǵan. Taıaý bolashaqta Kópkútir, Aqqýraı, Haırýsh, Saraljyn, Qyzyltý, Qarakól, Seksenbaev, Mereke, Satybaldy, Ashysaı, Jas, Tanat, Ábish, Elaman sekildi shaǵyn eldi mekenderge kógildir otyn jetkizý úshin jobalyq-smetalyq qujattar daıyn tur eken. Bul jumystar júzege asqan jaǵdaıda aýdan halqy túgelge jýyq tabıǵı otynmen qamtylady.
– 28 jyl ishinde elimizdiń ekonomıkasy nyǵaıyp, halyqtyń ál-aýqaty artty. Munyń barlyǵy siz ben bizdiń ortaq isterimizdiń nátıjesi, – dedi turǵyndardyń qýanyshyna ortaqtasqan Qaztalov aýdanynyń ákimi Albert Esalıev.
Aýdanda «О́ńirlerdi damytý» baǵdarlamasy boıynsha respýblıkalyq bıýdjetten bólingen 489 mln 227 myń teńge qarjyǵa 105,1 shaqyrym jeli iske qosylǵan. Bul jumystardy «ÁlıServıs», «GazGıd» mekemeleri sapaly atqarǵan.
Alaqandaı aýylymyzǵa tabıǵı gaz kelip, máre-sáre bolyp qýanyp jatyrmyz. Mine, azattyq týy jelbiregen beıbit eldiń erteńi dál osylaı sát saıyn gúldene berýi kerek, – deıdi Serik aýylynyń turǵyny Qymbat Abdrahmanova.
Batys Qazaqstan oblysy
