El Prezıdenti Qasym-Jomart Toqaevtyń Jarlyǵymen 28 jeltoqsan aza tutý kúni bolyp jarııalanyp, oıyn-saýyq is-sharalary toqtatylǵan bolatyn. Alaıda, Ereımentaý aýdanynyń ákimdigi dál sol kúni jańajyldyq korporatıvten bas tartpaǵan. Ádep jónindegi keńes otyrysynda ákim óz kinásin moıyndady.
– Men 28-i kúni taǵy bir joldasymnyń týysynyń týǵan kúni bolyp, «Asyltas» meıramhanasyna bardym. Sol jerde jınalǵan halyqty jańa jyl merekesimen quttyqtadym. Bilmegenim de bar shyǵar. Jańadan taǵaıyndalǵan ákimmin. Keleshekte mundaı qatelikterge jol berilmeıdi dep ýáde beremin, – deıdi Ereımentaý aýdanynyń ákimi Abaı Áljanov.
– Ákimniń kinási anyq dep oılaımyn. Árıne, budan da aýyr jaza qoldanyp, qyzmetinen bosatýǵa da bolatyn edi. Biz óz usynymymyzdy berdik. Al sheshimdi Aqmola oblysynyń ákimi Ermek Marjyqpaev qabyldaıtyn bolady. Sebebi, ol tikeleı oblys basshylyǵynyń qaramaǵyndaǵy qyzmetker, – deıdi oblystyq máslıhat hatshysy Álibek Baımaǵambetov.
Aıta keteıik, Abaı Áljanov ózi basqaratyn Ereımentaý aýdanynyń týmasy.
Aqmola oblysy
