Mysty qalada myltyq nege atyldy?

Bul tótenshe oqıǵa 21 qańtar kúni keshki saǵat 18.00-diń shamasynda «Qazaqmys» korporasııasy» JShS-niń ǵımaratyndaǵy ken-baıytý kombınatynyń bas dırektory Amangeldi Mınıgýlovtiń qyzmettik kabınetinde bolǵan.

Sol kúnniń keshinde mynadaı aqpa­rat el ishin kezip ketti: bas dı­re­k­tordyń kabınetinde kásipodaq uı­y­­mynyń tóraǵasy men ujym bas­­shysynyń arasynda kıkiljiń bol­ǵan da, bir ýaqytta kásipodaq kósh­bas­shy­sy syrtqa shyǵyp ketip, izinshe myltyq alyp kelip kabınetke qaıta kirgen. Sodan qyzmettik bólme ishinde myltyq atylyp, eki adam pyshaqtan jaraqat alyp, bireýi sol jerde ózine ózi qol salyp, qaza tapqan...

Endi belgisizdiktiń tumany seıil­gen­deı bolǵan kezdiń bıiginen qarap jáne keıingi resmı málimetterdi saraptaı otyryp, myna jaıttardy ja­ryqqa shyǵarýǵa bolatyn sııaqty. «Kásip Qorǵan» kásipodaq uıymynyń tóraǵasy Toǵyzbaı Tajbenovtiń bas dırektordyń kabınetine myltyq alyp kirgeni anyq bolǵan jaıt: ol beınebaqylaý kameralaryndaǵy tas­pa­ǵa jazylyp qalǵan. Bul tegis uńǵyly myltyq Tajbenovtiń atyna resmı tirkelgen atys qarýy eken. Sondaı-aq kásipodaq tóraǵasy kabınetke kirgennen keıin álgi myltyqtyń bir ret atylǵanyn da kýáler rastap otyr.

Budan keıin bas dırektor Aman­gel­di Mınıgýlovtiń kabınetinde ne bolyp, ne qoıǵanyn tiri jan bil­meı­di jáne aıta almaıdy. Sol jerde bolǵan qandy oqıǵanyń resmı organdar usynǵan nusqasy mynadaı: Tajbenov tóbege qarata myltyqty bir ret atqannan keıin, otty qarýdy sýyq qarýǵa aıyrbastap, bas dırektor Mınıgýlovtiń arqa tusynan pyshaq urǵan. Sol eki ortada arasha túsken Sabyrjan Tembaevtyń ishine de sýyq qarýdy suǵyp alypty. Sóıtken de, eki adamnyń qanyna malynǵan qara pyshaqty óziniń týra júregine salyp, sol jerde jan tapsyrǵan...

Jalpy, bul oqıǵa týrasynda qu­qyq qorǵaý organdary bergen maǵlu­mat­tardyń mardymsyz bolǵanyn jáne olardyń keshigip jetkenin aıtpasqa bolmas. Árıne, oqıǵa elimizdegi alpaýyt kásiporyndardyń birine qatysty bol­ǵan soń, tıisti organdardyń aqpa­rat­ty súzgiden ótkizip alý úshin ýaqyt ozdyrýǵa tyrysqany túsinikti jaıt. Biraq munyń jurtty naqty jáne tolyq málimetpen der kezinde qam­ta­masyz etý isinde qolbaılaý bol­ǵany ras edi. Tipti osynyń salda­rynan el ishine jón-josyqsyz áńgimelerdiń, túrli qaýesettiń tarap ketkeni de oqı­ǵa aınalasyndaǵy kúmánniń bul­tyn qoıýlata túsken.

Qazirgi ýaqytta bul oqıǵa tóńire­gin­­de órbigen dolbary kóp áńgime tyıyl­­­maı tur. Ásirese myna jaıt ózine nazar aýdarmaı qoımaıdy: bile­tin­derdiń aıtýynsha, kásipodaqtyń kósh­bas­shysy Toǵyzbaı Tajbenov týmysynan ashýshań adam emes, ustamdy minezi bar kisi eken. Jurtpen til tabysyp jumys isteýdi meńgergen, óz isine tııanaqty maman bolsa kerek. Iаǵnı, onyń ózine ózi qol salýy aqylǵa sy­ıymsyz degendi aıtqysy keledi onyń tanystary. Alaıda, «Ashý – dushpan» degen, Tajbenovtiń dırektordyń kabınetine myltyq alyp kirgeni jo­ǵa­ry­daǵydaı pikir aıtýshylardyń ózin tyǵyryqqa tirep qoıǵany ashy shyn­dyq...

Máseleniń túıini endi tarqatylyp, oqıǵanyń kóleńkeli tustaryna sáýle júgire bastaǵanda mynany aıtýdy laj sanadyq. Zady, qandy oqıǵaǵa ákelgen kıkiljiń taban astynda týyndamaǵan. Máselen, eńbekkerlerdiń salalyq kásipodaqtarynyń tóraǵasy Murat Máshkenovtiń aıtýynsha, Mınıgýlov pen Tajbenov arasynda biraz ýaqyttan beri jeke bas araz­dyǵy bolǵan eken. Al «Kásip Qor­ǵan» kásipodaq uıymy tóra­ǵa­sy­nyń oryn­basary Janat Sámenov jo­ǵa­ryda atalǵan eki aza­mat­tyń ara­syn­daǵy kıkiljińge kásip­odaq ujy­mynda qalyptasqan kúrdeli jaǵ­daı­dyń sebepshi bolýy ábden yq­tımal ekenin aıtady. Onyń sózine qara­­ǵanda, «Kásip Qorǵan» ká­sip­odaq­­tar uıymynda tóraǵa ustanǵan saıa­­sat­qa, onyń júrgizgen jumysyna kóp­­shilik­tiń kóńili kónshimeı júripti. Ke­lis­­­peýshilikter kóbeıip, ujymdaǵy be­­re­keniń keteýi kete bastaǵan. Osy­­­nyń bári bıylǵy jyldyń 5 qań­­­tarynda kásipodaq uıymynyń or­ta­lyq keńesinde bolǵan otyrysta keńi­nen talqylanǵan eken. Sol jıyn­­da kásipodaqtar uıymynyń ke­zek­­­­ten tys sezin aldymyzdaǵy 5 aqpan kúni ótkizý týraly sheshim de qabyl­danypty. Iаǵnı, kún tártibine kásip­odaq­tyń jańa tóraǵasyn saılaý máse­le­si shyǵarylǵan bolsa kerek.

Qazirgi tergeý organdary Toǵyzbaı Taj­­benovtiń ólimi faktisi boıynsha «Ony óltirý» nemese «О́zin ózi óltirýge deıin jetkizý» jónindegi eki boljamdy tekserýde. Sonymen qatar A.Mınıgýlov pen S.Tembaevtyń pyshaq jaraqattaryn alý faktisi bo­ıynsha da «О́ltirýge oqtalý» boljamy tergelý ústinde.

О́tken aptanyń juma kúni Toǵyz­baı Tajbenovtiń jambasy jerge tıdi. Topyraq óziniń týǵan jeri Je­z­­qaz­ǵannan buıyrdy. Úlken áýlet­ten shyqqan marqumdy jerleýge jıylǵan adamnyń qarasy mol boldy deıdi qaraly sharaǵa qatysqandar. Jez­qazǵandaǵy áriptesterimizdiń sózi­ne júginsek, marqumnyń týǵan-týys­ta­ry, jalpy osy oqıǵaǵa qatysy bar­lar­dyń tanystary men áriptesteri bul taqyryp týrasynda bálendeı pikir aıtýdan bas tartýdy jón sanaıdy eken. Biraq tergeýdiń ádil jáne ashyq bolǵanyn qalaıtyndyqtaryn bil­dirgen.

Al pyshaqtan jaralanǵan Aman­gel­di Mınıgýlov pen Sabyrjan Tem­baev qoly shıpa hırýrgterdiń arqa­synda aman qaldy. Ásirese bas dırek­tor­dyń jaraqaty aýyr bolǵan: oǵan kúrdeli ota jasaldy. Onyń áriptesi bolsa, aýrýhanada kóp jatpaı, úıine qaıtarylǵan.

«Búgingi kúni tergeý bastapqy sa­tyda bolǵandyqtan, kim, kimge, qa­laı jáne qandaı zatpen dene ja­r­aq­at­ta­ryn keltirgeni týraly túp­ki­likti qorytyndy jasaýǵa áli erte ekenin aıta ketý qajet. Oqı­ǵa­ǵa qatysýshylardyń árqaı­sy­synyń róli keshendi jedel-tergeý is-sharalarynan keıin jáne sarapshylar qorytyndylarynyń negizinde aıqyndalady», delingen oblystyq prokýratýranyń resmı málimdemesinde.

Sonymen qatar prokýratýra tur­ǵyn­dardan dáleldenbegen derek­ter­di taratpaı, tek resmı aqparatty bas­shy­lyqqa alýdy ótingen jáne atal­ǵan qylmystyq istiń tergelý barysy Qara­ǵandy oblysy prokýrorynyń jáne oblystyq polısııa departamenti bas­shysynyń baqylaýyna alynǵanyn jet­kizgen.

Bolǵan istiń aq-qarasy aıqyn­dal­maı­ynsha, syrttan ton pishýden boıdy aýlaq salǵan bizdiń de prokýratýra organdarynyń osy aıtqanyna alyp qosarymyz joq. Tek, kabınettegi kisi ólimine ákelgen kıkiljińniń kartınasy bar boıaýymen tolyq jáne shynaıy túrde ashylsa eken degen tilek ústindemiz.

Qaraǵandy oblysy