Taıaýda atalǵan murajaıda «Bala qııalyndaǵy ásemdik syry» atty kórme ashylyp, oǵan óner mektebi oqýshylarynyń 500-ge tarta kompozısııa, plenarlyq etıýdter, keskindeme, grafıka jáne músin túrindegi týyndylary qoıyldy.
– Bul kórme bir jylǵy jumystyń esebi ispetti jáne ol jyl saıyn ótip turady. Munda barlyq synyp oqýshylarynyń sýretteri, sondaı-aq túlekterdiń dıplomdyq jumystary jınaqtalǵan. Kórme «Rýhanı jańǵyrý» baǵdarlamasy aıasynda uıymdastyryldy, – deıdi Qaraǵandy oblystyq beıneleý óneri murajaıynyń jetekshisi Bıbigúl Qudabaeva.
Mundaı kórmeler 4-ten 17 jasqa deıingi balalar men jasóspirimderdi shyǵarmashylyq qabiletterin damytýǵa yntalandyryp, beıneleý óneri salasynda daryndy órenderdi anyqtaýǵa kómektesedi degen pikir aıtady murajaı qyzmetkerleri.
Kórmedegi týyndylardyń basym kópshiligi týǵan ólke, salt-dástúr men ulttyq mádenı qundylyqtardy taqyryp negizinde arqaý etken. Sonymen qatar munda sýret salýdyń akademııalyq tásilderimen birge batyl eksperımentaldy tehnıka qoldanylǵan jumystar da jetkilikti.
Atalǵan kórmeniń aıasynda beıneleý óneri muǵalimderine arnalǵan «Shyǵarmashylyq ıdeıalar festıvali» atty oblystyq semınar-praktıkýmyn ótkizý de josparda bar.
QARAǴANDY
