Keshe, 4 tamyz kúni Batys Qazaqstan oblysynyń polıseıleri jergilikti kásipker Amanǵalı Baıǵýanyshevti óltirdi degen aıyp taǵylyp otyrǵan kúdikti Hasan Gýbzaev Reseıdiń aımaqpen qatarlas jatqan Samara oblysynda qolǵa tústi. Bul týraly «Ýralskaıa nedelıa» habarlady.
Áńgime ústimizdegi jylǵy 19 aqpan kúni jumysshy kentinde oryn alǵan atys týraly bolyp otyr. Osy kúni «Berezka» dúkeniniń janynda belgisiz bireýler markasy anyqtalmaǵan qarýmen 37 jastaǵy Amanǵalı Baıǵýanyshevti atyp, kózden tasa bolady. Kásipker osy alǵan jaraqaty saldarynan «Jedel járdem» kóligi ishinde aýrýhanaǵa apara jatqanda qaıtys bolady.
Oqıǵanyń sońyn ala tekserýge kirisken polıseıler marqum Amanǵalı Baıǵýanyshevtiń 2004 jyly bopsalaý faktisi boıynsha sotty bolǵanyn, biraq bas bostandyǵynan aırylmaǵanyn, tek shartty merzimmen qutylǵanyn anyqtady. Osydan keıin ol bıznespen aınalysyp, óziniń valıýta aıyrbastaıtyn beketin ashyp alypty.
Jedel málimetter boıynsha Baıǵýanyshevtiń 22-25 jastar aralyǵyndaǵy jigitterden shaǵyn top qurǵanyn da jetkizdi. Amanǵalı solardyń kómegimen básekelesterin qorqytyp kelipti. Onyń ólimine deıin birneshe kún buryn kúdikti Hasan Gýbzaevtyń inisi Hýseın óz jigitterimen birge munyń tobyndaǵy jigitterdiń birin uryp tastapty. Osydan keıin Hýseın Gýbzaevty kezdestirgen Baıǵýanyshev qarýmen atyp, ony qolynan jaraqattaǵan eken.
«Sol kúni «Berezka» dúkeniniń janynda Hýseınniń aǵasy Hasan Gýbzaev anyqtalmaǵan qarýmen ózderin jábirleýshi Baıǵýanyshevti atyp ketedi, - deıdi polıseıler. – Osylaısha inisiniń qolyn jaraqattaǵany úshin aǵasy odan kek qaıtarady».
Polıseıler kisi ólimine kúdikti Hasannyń osy oqıǵadan úsh kúnnen keıin Qazaqstan-Reseı shekarasynan ótip, Orynbor oblysyna bet alǵanyn anyqtaıdy.
«4 tamyz, jeksenbi kúni aıyp taǵylýshy Gýbzaev Samara qalasynda qolǵa tústi, - dep habarlady oblystyq ishki ister departamentiniń baspasóz qyzmetinen. – Ustaý kezinde polısııa qyzmetkerleri Gýbzaevtan Reseıdiń jalǵan pasportyn aldy. Qazir ony Oral qalasyna jetkizý máselesi qaralyp jatyr».
Qurysh Nurymbet.
