«Ál-Ýatan» saraıynda ótken resmı kezdesýde Prezıdent Q.Toqaevty sheıh Muhammed ben Zaıd ál Nahaıan qarsy aldy. Sodan keıin eki memlekettiń Ánurandary oryndaldy.
Kelesi kezekte Memleket basshysy Q.Toqaev pen BAÁ taq murageri sheıh Muhammed ben Zaıd ál Nahaıan birlesken sýretke túsip, delegasııa múshelerin ózara tanystyrdy. Saltanatty rásimnen keıin Prezıdent Qurmetti qonaqtar kitabyna estelik qoltańbasyn qaldyrdy.
«Elińiz ben «Ál-Ýatan» saraıyndaǵy jyly qabyldaýyńyz úshin shynaıy alǵysymdy bildiremin. Qazaqstan men Birikken Arab Ámirlikteriniń dostyǵy men baýyrlastyq qarym-qatynastary nyǵaıa bersin. Ámirlikter halqynyń yrysy men berekesi baıandy bolýyna tilektespin!
Izgi nıetpen, Qazaqstan Respýblıkasynyń Prezıdenti Qasym-Jomart Toqaev», delingen Qurmetti qonaqtar kitabynda jazylǵan tilekte.
Budan soń memleketter basshylary ekijaqty kelissózder ótkizdi. Mártebeli meımandy qurmetpen qarsy alǵan sheıh Muhammed ben Zaıd ál Nahaıan sóz alyp, osy sapary úshin Q.Toqaevqa alǵys bildirdi.
«Joǵary mártebeli Prezıdent myrza. Elimizge, Birikken Arab Ámirlikteri aýmaǵyna qosh keldińiz. Birikken Arab Ámirlikteri prezıdenti sheıh Halıfa ıbn Zaıd ál Nahaıannyń Sizge joldaǵan ystyq yqylasty lebizin bildirgim keledi. Ámirlikterdiń basshysy saparyńyzǵa zor tabys tileıdi», dedi murager hanzada.
Sonymen qatar sheıh Muhammed ben Zaıd Qazaqstannyń Tuńǵysh Prezıdenti – Elbasy Nursultan Nazarbaevqa da el Prezıdentiniń sálemin jetkizdi.
«Ámirlikterdiń Prezıdenti jáne meniń ystyq sálemimdi jańa Qazaqstannyń negizin qalaýshy, jaqyn dosym, joǵary mártebeli Nursultan Nazarbaevqa jetkizýdi suraımyn. Ámirlikterdiń negizin qalaýshy sheıh Zaıd ben Sultan ál Nahaıanmen óte jaqyn qarym-qatynasta boldy. Eki el arasyndaǵy baılanysty nyǵaıtýǵa, keńeıtýge zor úles qosty. Qazirgi ýaqytta ózara qarym-qatynastarymyz óte joǵary deńgeıde dep aıta alamyz», dedi sheıh Muhammed ben Zaıd.
Osy oraıda, myna nárseni aıta ketken jón. Qazirgi tańda Birikken Arab Ámirlikteriniń Prezıdenti – sheıh Halıfa ben Zaıd ál Nahaıan. Alaıda onyń densaýlyǵy nasharlaýyna baılanysty, mártebeli meımandardy kútip alý, Ábý-Dabıdiń kúndelikti tirshiligine qajetti sheshim qabyldaý sekildi mańyzdy jumystardy atqarý Ábý-Dabıdiń taq murageri, BAÁ-niń negizin qalaýshy sheıh Zaıd ben Sultan ál-Nahaıannyń úshinshi balasy sheıh Muhammed ben Zaıdke júktelgen.
Sondaı-aq sheıh Muhammed ben Zaıd Qazaqstanmen yqpaldastyqty damytýdyń mańyzyna toqtalyp, ózara áriptestiktiń sony tustaryn atap kórsetti.
«Biz Birikken Arab Ámirlikteri Qazaqstanmen yqpaldastyqty damytýǵa erekshe mańyz beremiz. Eki el arasyndaǵy yntymaqtastyqtyń barlyq baǵyty men múmkindigi mol. Osy rette, 2019 jylǵy qyrkúıekte Ábý-Dabıde ótken Qazaqstan men Ámirlikterdiń úkimetaralyq komıssııasynyń jumysy nátıjeli aıaqtaldy. Keıingi jyldary Qazaqstan men Ámirlikter arasyndaǵy saýda aınalymy ósip keledi. Ámirlikter Qazaqstannyń arab álemindegi taýar aınalymy boıynsha eń birinshi saýda áriptesi sanalady. Qazaqstan Ámirlikter ınvestısııasyn tartý boıynsha Ortalyq Azııa elderi ishinde negizgi elge aınaldy», dedi taq murageri.
Sheıh Muhammed ben Zaıd óz eliniń tuńǵysh ǵaryshkeri aspan álemine qazaq dalasynan ushqanyna erekshe ekpin berdi. Esterińizde bolsa, byltyr Birikken Arab Ámirlikteriniń tuńǵysh ǵaryshkeri Hazzaa Álı ál-Mansýrı zańǵar kókke «Baıqońyr» ǵarysh aılaǵynan ushqany esimizde. Jerge aman-esen oralǵan ál-Mansýrıdi alǵash qushaǵynda aıalaǵan da Saryarqanyń saıyn dalasy ekenin arabtar áli kúnge tamsana áńgimeleıdi.
«Osy rette joǵary mártebeli eki el arasyndaǵy ǵarysh salasyndaǵy yntymaqtastyqty erekshe atap ótkim keledi. О́tken jyly Ámirlikterdiń tuńǵysh ǵaryshkeri Qazaqstandaǵy Baıqońyr ǵarysh aılaǵynan Halyqaralyq ǵarysh ortalyǵyna attandy», dedi sheıh Muhammed ben Zaıd.
Budan keıin aımaqtaǵy ahýaldyń qazirgi jaǵdaıyna toqtalyp, Ámirlikterdiń negizgi saıasaty aımaqtaǵy máselelerdi beıbit jolmen sheshý, toleranttylyqty nyǵaıtý, halyqaralyq arenada ózara beıbitshilikte ómir súrý ekenin atap ótti.
«Ámirlikter men Qazaqstan Respýblıkasy Islam Yntymaqtastyǵy Uıymy sheńberinde tyǵyz áriptestik ornatty. Eki el osy uıymnyń bedelin arttyrý boıynsha birlesip jumys atqarady.
Qazaqstannyń Islam álemindegi orny erekshe. Joǵary mártebeli Prezıdent myrza! Elimizge hosh keldińiz. Osy saparyńyz eki el arasyndaǵy yntymaqtastyqty joǵary deńgeıge kóteretinine kámil senemin», dep sózin túıindedi taq murageri.
Osydan keıin Qazaqstan Prezıdenti Qasym-Jomart Toqaev sóz alyp, qonaqjaılyq kórsetkeni úshin alǵysyn bildirdi.
«Bul meniń Prezıdent retinde arab álemine tuńǵysh saparym. Sondyqtan, bul sapar Qazaqstannyń Sizdiń elge úlken mán berip otyrǵanyn ańǵartady. Osy múmkindikti paıdalanyp, Sizge Tuńǵysh Prezıdentimiz – Elbasy Nursultan Nazarbaevtyń ystyq lebizin jetkizgim keledi. Shyn máninde, eki eldiń arasyndaǵy qarym-qatynastyń arqasynda kóptegen jetistikterge qol jetkizdik», dedi Memleket basshysy.
Q.Toqaev áriptesiniń sózimen kelisetinin aıta otyryp, eki eldiń baılanysy shynaıy dostyq, ózara túsinistik pen senimge negizdelgenin jetkizdi.
«Eki el arasyndaǵy qarym-qatynastar tarıhynyń tamyry tereń. Bizdi shynaıy dostyq, ózara senim men túsinistik baılanystyrady. Sondyqtan qarym-qatynastarymyzdyń keleshegi zor. Meniń saparymnyń negizgi maqsaty – eki memlekettiń yntymaqtastyǵyna tyń serpin berý. Biz úlken jetistikterge qol jetkizdik, biraq bir orynda toqtap qalýǵa bolmaıdy. Alǵa jyljýymyz kerek. Men osy saparǵa erekshe mán beremin jáne úlken úmitpen qaraımyn», dedi Prezıdent.
Kelesi jyly Ámirlikterdiń qurylǵanyna 50 jyl tolmaq. Al Qazaqstan 2021 jyly Táýelsizdiktiń 30 jyldyǵyn atap ótedi. Osyny eske túsirgen Memleket basshysy bul Qazaqstan úshin asa mańyzdy tarıhı meje dep málimdedi.
«Dıplomatııalyq qatynastar ornaǵan 28 jylda Nur-Sultan men Ábý-Dabı kópqyrly yntymaqtastyqty nyǵaıtyp, mazmundy ári ashyq saıası dıalog qalyptastyrdy. Ásirese saýda-ekonomıkalyq jáne mádenı-gýmanıtarlyq baılanystarymyz qarqyndy damyp keledi. Eki el kásipkerleri belsendi jumys isteýde. Búgingi tańda 350-ge jýyq birlesken kásiporyn quryldy. Mysaly, elordamyz Nur-Sultan qalasynda salynyp jatqan Ábý-Dabı Plaza kesheni – osyndaı tabysty baılanystardyń jarqyn kórinisi», dedi Q.Toqaev.
Kezdesý barysynda munaı-hımııa, aýyl sharýashylyǵy, kólik-logıstıka, qarjy jáne ınvestısııa salalaryndaǵy ózara is-qımyldar men yntymaqtastyq máseleleri qarastyryldy. Ekijaqty kezdesý aıaqtalǵannan keıin, kelissózder qorytyndysy boıynsha birqatar memleketaralyq kelisimge qol qoıyldy.
Atap aıtsaq, Qazaqstan Energetıka mınıstrligi men BAÁ Energetıka jáne ónerkásip mınıstrligi arasynda Munaı-hımııa ónerkásibi salasyndaǵy ózara túsinistik pen yntymaqtastyq týraly memorandýmǵa, Qazaqstan Saýda jáne ıntegrasııa mınıstrligi men BAÁ ekonomıka mınıstrligi arasyndaǵy ózara túsinistik týraly memorandýmǵa, «Astana» halyqaralyq qarjy ortalyǵynyń Qarjylyq qyzmet kórsetýdi retteý jónindegi komıteti men BAÁ Ortalyq banki arasyndaǵy ózara túsinistik týraly memorandýmǵa qol qoıyldy.
Abaı ASANKELDIULY,
«Egemen Qazaqstan» – Ábý-Dabıden (Birikken Arab Ámirlikteri)
