Jambyl oblystyq densaýlyq saqtaý basqarmasynyń habarlaýynsha, búginde oblystyq balalar juqpaly aýrýlar aýrýhanasy men aýdandyq ortalyq aýrýhanalarynyń ınfeksııalyq bólimshelerinde 503 tósek bar. Onyń 185-i eresekterge arnalǵan bolsa, 318-i balalarǵa arnalǵan. Qosymsha taǵy 333 tósek qarastyrylyp, daıyndalǵan.
Medısınalyq uıymdar jeke bas qorǵanys kıimderimen, vırýsqa qarsy preparattar men vırýsılıdti dezınfeksııalyq zattardyń qorymen qamtamasyz etilgen. Obaǵa qarsy 1826 dana 1 tıptik kóp rettik kostıým, 9942 dana bir rettik qorǵanys kostıým, 2717 qaptama tamıflıý, 49 qaptama relenza, 960 qaptama oksalın jaqpamaıy daıyndalǵan.
Sonymen qatar, oblysta medısına qyzmetkerleriniń arasynda belgisiz pnevmonııanyń dıagnostıkasy, emdeý jáne aldyn alý týraly keńes-semınarlar uıymdastyryldy. Barlyǵy 45 semınar ótip, oǵan 3226 medısına qyzmetkerleri qamtyldy. Jergilikti quzyrly mekemeler mamandarynyń qatysýymen «Áýlıe Ata» áýejaıynda belgisiz pnevmonııanyń ákelinýi men onyń taralýynyń aldyn alý, birinshi kezektegi sharalardy uıymdastyryp ótkizý boıynsha oqý-jattyǵý sabaǵy ótti. Emdeý mekemeleriniń, onyń ishinde jedel medısınalyq járdem stansııasynyń medısına qyzmetkerleri arasynda belgisiz pnevmonııanyń kúdikti jaǵdaılaryn anyqtaý, tirkeý, esepke alý, shuǵyl habarlama joldaý, naýqastardy qabyldaý men olarǵa jedel mamandandyrylǵan kómek kórsetý boıynsha daıarlyǵy shyńdaldy. Oblystyń barlyq medısına uıymdarynyń qabyldaý bólimderinde, qaraý bólmelerinde, jedel medısınalyq járdem stansııasynda medısına qyzmetkerlerine arnalǵan algorıtmder ázirlendi.
Jambyl oblystyq polısııa departamenti kóshi-qon basqarmasynyń málimetterine sáıkes, aǵymdy jyldyń qańtar aıynda Qytaı Halyq Respýblıkasynan Jambyl oblysyna 37 azamat kelgen. Búginde olardyń barlyǵy turaqtanǵan meken-jaıy boıynsha medısına qyzmetkerleriniń qatań baqylaýynda. Qazirgi tańda 25 azamat 14 kúndik medısınalyq baqylaýǵa alynǵan. 12 azamat medısınalyq baqylaýda, shaǵymdary joq.
Jambyl oblysy
