Qazaqstan Prezıdenti keshe Birikken Arab Ámirlikteriniń Vıse-prezıdenti, Premer-Mı­nıstri, Dýbaı bıleýshisi sheıh Muhammed ben Rashıd ál Mak­týmmen kezdesti.

Áńgimelesý barysynda eki eldiń óńirlik jáne jahandyq deńgeıdegi seriktestik máseleleri talqylandy. Memleket basshysy Dýbaıdyń álemdegi iri qarjy jáne týrıstik ortalyqtardyń birine aınalýyna yqpal etken reformalarǵa joǵary baǵa berdi.

Taraptar sıfrly ekonomıka, elektrondy kommersııa, za­manaýı ınfraqurylym, jasan­dy ıntellekt, qarjylyq qyz­met kórsetý isi, ınvestısııa, tý­rızm ındýstrııasy, qurylys pen kólik salalaryndaǵy ynty­maq­tastyqtyń perspektıvalaryn qarastyrdy.

Memleket basshysy Qazaq­stan­nyń Birikken Arab Ámirlik­teri­men aradaǵy ekijaqty ynty­maq­tastyqty nyǵaıtýdyń mańyz­dylyǵyn atap ótip, birlesken bıznes-jobalardyń iske asyrylýyna tyń serpin berýge nıetti ekenin jetkizdi.

«Bizdiń elimiz týrızmniń ja­handyq tarıhpen baılanysty qyzmetterin ilgeriletýge daıyn. Mysal retinde Altyn Ordany alýǵa bolady. Osyǵan oraı ishki týrızmdi damytýdaǵy, ony saıahatshylar úshin tartymdy baǵyt etýdegi Ámirlikterdiń týrıstik bız­nesti júrgizý tájirıbesi bizge óte mańyzdy», dedi Qasym-Jomart Toqaev.

Sheıh Muhammed ál Maktým Ámir­likterdiń ekonomıkanyń ár­­túrli sektorlaryn damytý jón­indegi tájirıbeleri men bilimderin Qazaqstanmen bóli­sýge daıyn eke­nine toqtaldy. So­ny­men qatar ol Qasym-Jo­mart Toqaevqa Dý­baıdyń «EKSPO-2020» dúnıe­júzilik kór­me­­sine daıyndyq barysy týraly aıtty.

Osy oraıda aıta keteıik, Q.To­­qaev Dýbaıǵa kelerdiń aldyn­­da Ábý-Dabı qalasynda taǵy bir mańyzdy kezdesý ótkizdi. Atap aıtqanda, Qazaqstan Prezı­denti Ábý Dabı Ámirligin bıleý­shi áýlettiń ókili, Birikken Arab Ámir­likterindegi iri bıznes ókili, «Etihad Towers» kópfýnk­sıo­naldy kesheniniń ıesi, «First Abu Dhabi Bank» aksıoneri sheıh Sýrýr ben Muhammed ál Nahaıan­men kezdesti.

Kezdesýde Memleket basshysy Birikken Arab Ámirlikteri Qazaq­stannyń Taıaý Shyǵystaǵy senim­di seriktesteriniń biri eke­nin, sapar barysynda Ábý Dabı­diń taq murageri, sheıh Muham­med ben Zaıd ál Nahaıanmen ekijaq­ty yn­­tymaqtastyqty odan ári da­my­­týǵa ýaǵdalasqanyn atap ótti.

Sheıh Sýrýr ben Muhammed ál Nahaıan Qazaqstan Prezıdenti Qasym-Jomart Toqaevqa óziniń «West Hydrocarbons Commercial Investment LLC» kompanııasynyń Batys Qazaqstan oblysynda munaı óńdeý zaýytyn salyp jatqanyn aıtty. Aldaǵy ýaqytta da bizdiń elimizben birlesip ju­mys isteýge, jańa jobalarǵa ınvestısııa salýǵa nıet bildirdi.

Iri bıznes ókilderimen kezdesý  Dýbaıda da jalǵasty. Memleket basshy­sy Dýbaı ınvestısııalyq korpo­ra­sııasynyń atqarýshy dı­rektory Muhammed ash-Shaı­banımen kezdesti.

Kezdesý barysynda qar­jy sala­syndaǵy ózara yntymaq­tas­tyqqa jáne «Astana» ha­lyq­ara­lyq qarjy ortalyǵynyń odan ári damý perspektıvasyna qa­tysty máseleler talqylandy.

Sonymen qatar Dýbaı ınves­tısııalyq korporasııasynyń Qazaqstandaǵy jekeshelendirý baǵ­darlamasyna jáne «Astana» ha­lyq­aralyq qarjy ortalyǵy bır­jasynyń jumysyna bel­sen­di qatysý múmkindikteri qaras­tyryldy.

Qasym-Jomart Toqaev Mu­ham­­­­med ash-Shaıbanıge Qazaq­stan ak­tıvterine ınvestısııa salý­­ǵa jáne satyp alýǵa qyzy­ǵý­shy­lyq bildirgen jaǵdaıda, biz­diń mem­lekettik qurylymdardyń ınves­torlar úshin qolaıly jaǵdaı jasaýǵa daıyn ekenin aıtty. 

Memleket basshysy sapar aıasynda Dýbaıdyń Halyqaralyq qarjy ortalyǵyn (DIFC) aralap kórdi.

Dýbaıdyń Halyqaralyq qarjy ortalyǵynyń basqarma tór­aǵasy Arıf Amırı Qasym-Jomart Toqaevqa arnaıy ekono­mı­kalyq aımaq jumysynyń prınsıpteri, qajetti zańdyq, kom­mersııalyq jáne basqa da ınfraqurylymdarmen qamta­masyz etý arqyly bıznes pen qar­jy ınstıtýttary úshin tartym­dy jaǵdaı jasaý jóninde aıtty.

Búginde Ortalyqta zańdy túrde 2300-ge jýyq kompanııa tir­kelgen. 2024 jylǵa qaraı olar­­dyń Dýbaı Ámirliginiń ishki jal­py ónimine qosatyn úlesi shamamen 15 paıyz bolmaq.

Memleket basshysy «Astana» halyqaralyq qarjy ortalyǵy men Dýbaıdyń Halyqaralyq qar­jy ortalyǵy arasynda tyǵyz yqpaldastyq ornatýdyń, Dýbaı­dyń tabysty tájirıbesin «Asta­na» halyqaralyq qarjy orta­ly­ǵynyń jumysyna paıdalanýdyń mańyzdylyǵyn atap ótti.

Sondaı-aq Memleket basshysy Dýbaıda ótetin «EKSPO-2020» kórmesine daıyndyq barysymen tanysyp, dúbirli jıynǵa arnap salynatyn Qazaqstan pavılo­nynyń qurylysyn aralap kórdi. Jahandyq is-shara 2020 jyldyń 20 qazany men 2021 jyldyń 10 sáýiri aralyǵynda «Aqyl-oıdy ushtastyrý – bolashaqty qa­lyp­tastyrý» degen taqyryppen ótedi.

«EKSPO-2020» kórmesin damytý jónindegi basqarýshy dırektor Ahmed ál Hatıbtiń aıtýynsha, kórmege 20 mıllıonnan astam adam keledi dep josparlanǵan. «EKSPO-2017» Ulttyq kompanııasy Halyqaralyq qatynastar depar­tamentiniń dırektory Nur­­bek Ergeshbaevtyń sózine qara­­ǵanda, Dýbaıda ótetin «EKSPO-2020» kórmesindegi Qazaqstan pavılonyna 3400 sharshy metr jer bólingen.

«Jeltoqsan aıynda qurylys jumystary bastaldy. Ony «EKSPO-2020» uıymdastyrý komı­tetiniń bekitken kestesine saı júrgizemiz. Tamyzda qurylys tolyq aıaqtalýy tıis. Bizdiń pavılony­myzda úsh aımaq bolady. Birin­shisinde Qazaqstan týraly, týrıstik áleýetimiz jóninde ın­teraktıvti derekter ornalasty­rylady. Sondaı-aq Nur-Sultan qalasy jóninde taǵy bir aı­maq bolady. Úshinshi aımaqta eli­mizdiń ekonomıkalyq múmkin­dikteri, ınvestısııalyq áleýetimiz týraly málimetter beriledi. Bıyl­ǵy «EKSPO-2020» kórmesin mıl­lıondaǵan týrıst tamashalaı­dy dep josparlanǵan. Bul múmkindikti jan-jaqty paı­dalanýymyz qajet», dedi N.Ergesh­baev.

Qazaqstan pavılony Birikken Arab Ámirlikteriniń negizgi pa­vılonyna jaqyn jerdegi «Múm­kindikter» dep atalatyn klasterde ornalasady. Ulttyq ekspozısııa birneshe bólikke bólingen. Onda óńirimizdiń álemde alatyn orny, elimizdiń týrıstik áleýeti, tarıhy, mádenıeti jáne astanasy týraly aqparat beriledi. Sonymen qatar kórmege kelýshiler Qazaqstannyń ekonomıkalyq jáne ınvestısııalyq múmkin­dik­teri jóninde málimet ala ala­dy. Interaktıvti shoýdyń sońyn­da pavılon qonaqtaryna jasan­dy ıntellektiniń adamzat bo­lashaǵyna áseri týraly aıtylady.

Abaı ASANKELDIULY,

«Egemen Qazaqstan» – Ábý-Dabı, Dýbaı (Birikken Arab Ámirlikteri)