Oral qalasynyń irgesindegi Krýgloozernyı kentinde resmı esep boıynsha 8 myńdaı ha­lyq turady. Beıresmı derek aýyl turǵyndarynyń sany 9 myń­nan asyp ketkenin aıtady. Taıaý bola­shaqta kent halqy eki esege kó­beıýi múmkin ekenin ákim­dik te moıyndaıdy. Turǵyn úı sa­lý úshin jer kezeginde tur­­ǵan azamattarǵa Oral qala­sy­nyń Bas josparyna sáı­kes Krýgloozernyı kenti aý­ma­­ǵynan 1 140 jer ýchaskesi be­­ril­mek. Qa­la ákimi 2019 jyly tur­­­ǵyn­dar al­dyndaǵy esebinde bul ýchas­­keler­diń jobalyq-sme­talyq qu­jat­tary saraptamada jat­qa­nyn aıtqan edi. Al osyndaı iri eldi­­ mekende balabaqsha joq!

Kenttegi balabaqsha tapshy­lyǵy jergilikti ákimdikti talaı jyldan beri mazalap kele­di. Oral qalasy ákimdiginiń 2018-2020 jyldarǵa arnalǵan «Jer­­gilikti qoǵamdastyqty damy­­tý baǵdarlamasynda» Krýg­lo­ozer­nyı kentine balabaq­sha qa­jet­tiligi eń birinshi másele bolyp kórsetilgen. 2018 jylǵy esepte «Jyl saıynǵy eseptik kezde­sý­lerde kóterilip júrgen máse­leniń biri balabaqsha bolatyn. 2018 jyly bul másele óz she­shimin tappaq. Qazirgi tańda Krýgloozernyı kentinde mem­leket-jekemenshik áriptestigi baǵ­­darlamasy boıynsha 160 bala­­ǵa arnalǵan balabaqsha qu­ry­lysy bastalyp jatyr, mer­diger – «Oralzemtrýbservıs» meke­­mesi. Sonymen qatar «Qam­qor qu­rylys» JShS balabaqsha qury­­­lysyn júrgizý úshin
TÝSM-14 me­kemesi ǵımaratynyń bóligin satyp alyp, ǵımaratty balabaq­shaǵa beıimdeý jumysyn júrgi­zýde» delingen.

2018 jyly sheshimin tabady degen bul másele 2020 jyldyń basynda da tappady. Bul jospar neden buzyldy?!

Oblystyq bilim basqar­ma­synan alynǵan qujattarǵa qaraǵanda «Qam­qor qurylys» JShS 2019 jyl­dyń 3 qańtarynda «Oral qalasy Krýgloozernoe aýylynan 100 oryndyq balabaqsha qurylysyn iske qosý jáne mem­lekettiń teńgerimine berý boıynsha» bıznes jospar jobasyn usynǵan.

Osy jobaǵa oraı Oral qalalyq bilim bólimi Krýgloozernyı kentinde mek­­tepke deıingi mekemege muqtajdyq bar ekenin qýattap, 30 qańtar kúni №7-1/507 hat túsirgen. Oblystyq bilim bas­qarmasy basshysynyń orynbasary S.Aıtqalıeva da «Qamqor qurylys» JShS dırektory T.Nurǵazıevke «Búgingi tańda Krýgloozernoe aýyly boıynsha kezekte 150-ge jýyq bala turǵanyn, atalǵan aýylda balabaqsha ǵı­maraty qajet ekenin» baıandap, áleýet­ti jekeshe seriktes retinde qu­jat­­tardy usynýdy suraǵan.

Ári qaraı zańǵa sáıkes merzimdi baspasózde habarlandyrý jarııalanyp, jumys bastalyp ta ketedi. 2019 jylǵy 18 naýryzda ótken konkýrstyq komıssııanyń hattamasyna nazar sa­laıyq: «Memleket-jekemenshik árip­tes­tigi aıasynda júzege asyrylatyn «Batys Qazaqstan oblysy Oral qalasy Krýgloozernoe aýylynan 100 orynǵa arnalǵan balabaqsha ǵımaratyn iske qosý jáne paıdalanýǵa berý» jobasy boıynsha jekeshe áriptestigin aıqyndaý jónindegi konkýrstyq ko­mıs­sııa otyrysy oblys ákiminiń oryn­basary Ǵ.Ospanqulovtyń tóra­ǵa­lyǵymen ótip, «Qamqor qurylys» JShS engizgen memleket-jekemenshik áriptestigi joba­synyń bıznes-jos­pa­ry jáne kelisim­shart jobasy ma­­q­ul­­­danǵan. Bul qujatqa jekeshe árip­testigin aıqyndaý jónindegi kon­­­­kýr­s­tyq komıssııanyń tóraǵasy Ǵ.Ospan­qulov, komıssııa músheleri – ob­lystyq bilim basqarmasy, ekono­mı­ka jáne bıýdjettik josparlaý bas­qar­masy, qarjy basqarmasy, jer qaty­nastary basqarmasy, qurylys bas­qar­masy, memlekettik sáýlet-qu­ry­lys baqylaý basqarmasy, kásip­kerlik jáne ındýstrıalyq-ınno­va­sııalyq damý basqarmasy jáne bas­qa­lary qol qoıǵan.

Osylaısha, balabaqsha kútken aýyl turǵyndarynyń armany orynda­lar kún jaqyndaı túskendeı edi.

– Aýylymyzda Keńes ókimeti qu­la­ǵannan beri balabaqsha bolǵan emes. Qazir mundaǵy jalǵyz aralas mektep janynan ashylǵan balabaqsha tobynda 25 bala, shaǵyn ortalyqta 25 bala tárbıelenip jatyr. Bul óte az. Balabaqsha jetispeıdi. Men nemeremdi eki jyldan beri Oral qalasyna tasyp júrmin. Ala tańnan oıatyp alyp, avtobýspen alyp baramyn. Obal ǵoı balaǵa. Qyzym múgedek, bala qaraı almaıdy, ózim jumystamyn. Balalaryn ornalastyra almaı, jumysqa shyǵa almaı otyrǵan ata-analar óte kóp. «Qamqor qurylys» kompanııasynyń jumysyn kórip, «jaqynda jańa balabaqsha ashylady» dep qýanyp júrgenbiz. Qala, kent ákimderi «Bul balabaqsha MJÁ baǵdarlamasy bo­ıynsha kóp keshikpeı iske qosylady» dep talaı márte ýáde berip, bizdi qý­antqan edi. Qurylysy bitip, dap-daıyn turǵan balabaqshanyń halyq ıgi­ligine nege berilmeı jatqanyn tú­sin­beımiz, – deıdi aýyl turǵyny Jańyldyq Áýbákirova.

Bul aralyqta qurylysshylar ekiqabatty, jalpy aýmaǵy 466,8 jáne 452,9 sharshy metr, 2487 sharshy metr jer kólemi bar balabaqsha ǵı­maratyn daıyndap úlgergen bo­latyn. 100 adamǵa arnalǵan ba­la­baq­sha­da búkil jıhaz, tósek oryn, ashana jabdyǵy, qaýipsizdik quraldary, tipti tolyq beınebaqylaý júıesi jasaqtaldy. Balabaqshanyń jobalyq qujattaryn jasaǵan «Oral» áleý­met­tik-kásipkerlik korporasııasy» aksıonerlik qoǵamy mektepke deıingi mekemege qajetti barlyq talapty eskerip, qurylys kompanııasy sol talaptan aýytqymaǵan.

Bul jobaǵa saraptama júr­giz­gen «Algarıtm» tehnoparki» ja­ýap­ker­shi­ligi shekteýli seriktestigi jobany «memleketke tıimdi» dep sheshim shy­ǵar­ǵan.

Mine, negizgi jumys aıaqtalyp, endi jańa balabaqshanyń tusaýkeser toıy ǵana qalǵandaı edi. Alaıda, bári aıaq astynan ózgerdi.

– Halyqqa tıimdi, memleket saıa­satyna, zań talaptaryna saı joba burynǵy oblys ákimi A.Kólginovtiń tu­synda tolyq qoldaýǵa ıe bol­ǵa­nymen, 2019 jyly shildede oblys basshylyǵy aýysqan soń aıaq asty­nan kedergige tap boldy. Oblys ákimdigi osy kezge deıin ýáde beril­gen MJÁ kelisiminen bas tartyp, «ınvestısııalyq shyǵyndardy óteýsiz iske asyrýdy» usynyp otyr. Osynyń nátıjesinde biz 170 mln 475 myń teńge shyǵynǵa batqaly otyrmyz. Bul tek qurylys jumysy men balabaqsha qural-jabdyǵyna ketken qarjy. Qazir kún saıyn daıyn ǵımarattyń ınjenerlik-kommýnaldyq shyǵyn­da­ry úshin de aqsha tólep jatyrmyz, – deıdi «Qamqor qurylys» JShS dırektory T.Nurǵazıev.

«MJÁ baǵdarlamasy aıasynda júzege asatyn bul jobanyń nátı­je­sin­de Krýgloozernoe kentiniń mektepke deıingi ınfraqurylymy damyp, oblys bıýdjeti únemdeledi. 27,5 jańa jumys orny ashylady, jergilikti jáne respýblıka bıýdjetine 41 358,43 myń teńge salyq retinde túsedi. Bala­baq­sha tapshylyǵy azaıady, óńirdegi MJÁ jobalarynyń maqsatty ındıkatory joǵarylaıdy. Sondaı-aq 8 jyl 3 aı merzimge jasalǵan MJÁ jobasy úshin memleket tarapynan tóle­netin 315 243, 46 myń teńge qar­jy 4 jyl ishinde ózin ózi aqtap shyǵady» delingen bolatyn saraptamada «Algarıtm» tehnoparki» jaýap­ker­shiligi shekteýli seriktestigi. Bul saraptama memlekettik organnyń tap­syrysymen memleket qarjysyna ja­sal­ǵanyn aıta keteıik.

Biz redaksııaǵa kelip túsken kásip­ker­diń shaǵymyna oraı birqatar tıisti oryndarǵa habarlastyq. Eko­nomıka jáne bıýdjettik jospar­laý basqarmasynyń basshysy A.Nur­ǵalıeva «MJÁ jobalary úshin mem­le­kettik mindetteme qa­byl­­daý úshin oblystyq bıýdjettik komıs­sııa­­sy­nyń usynysy qajet. Atalǵan joba 2019 jylǵy 5 qyrkúıekte ótken komıssııa otyrysynda qoldaý tappady» dep jaýap berse, oblystyq máslıhat hatshysy M.Qulshardan: «Krýgloozernoe aýylyndaǵy bala­baq­sha týraly másele oblystyq máslıhat janyndaǵy «qar­jy jáne bıýdjet máseleleri boıynsha» turaqty komıssııa otyrysynda qaralǵan joq. Eger Krýgloozernoe aýylyndaǵy balabaqsha týraly másele oblystyq atqarýshy organdardan kelip tússe, oblystyq máslıhattyń turaqty komıssııalary otyrystarynda qaraýǵa ár ýaqytta múmkindik bar» degen jaýap aldyq. Osy jobanyń negizgi úılestirýshisi bilim basqarmasynyń basshysy A.Trjanova Krýgloozernoe aýylyna balabaqsha kerektigin, biraq «Qamqor qurylys» JShS usynǵan jobany oblystyq bıýdjettik komıssııasy maquldamaı otyrǵanyn aıtady. «Biz bul jobany birneshe márte usyndyq. Biraq daıyn balabaqsha ǵımaratyn memleketke satyp alýǵa dál qazir bıýdjette qarjy joq degen jaýap aıtyldy» deıdi A.Trjanova.

Bul aralyqta balabaqsha kútip sarǵaıǵan aýyl turǵyndary qala, oblys basshylaryna, Nur Otan partııasyna, tipti prokýratýraǵa ujymdyq hat jazyp, máseleni sheshetin mekeme tappaı sandalyp júr.

– Tórt balamnyń ekeýi mektepke barady, ekeýi úıde. Balabaqsha kezeginde turmyz. Aýylda balabaqsha ashylsa, kóp balaly otbasy retinde birden alynýy tıis. Biraq daıyn tur­ǵan balabaqshaǵa kire almaı otyr­ǵa­nymyz janǵa batady. Qazirgi mektep ǵımaratynyń birinshi qabatyn alyp turǵan shaǵyn ortalyq ta oqýǵa kedergi. Meniń qyzym birinshi synypta oqıdy, kabıneti ekinshi qabatta. Zań boıynsha olar birinshi qabatta bolýy kerek edi. Jańa balabaqsha ashylsa, mektep ǵımaraty bosap, alańsyz óz jumysymen aınalysar edi, – deıdi aýyl turǵyny Aınur Manaıhan.

Aldyn ala kelisilgen memleket-jekemenshik áriptestigi jobasy aıaq asty­nan kedergige ushyraǵan «Qamqor qurylys» JShS ókilderi ýaıymdap otyr. Tıisti oryndarǵa jiberilgen shaǵymdar, BAQ-ta kóterilgen másele ázirge nátıje shyǵarar emes. Qurylys­shy­lar endi respýblıkalyq deńgeıdegi organdardan arasha suramaq.

Batys Qazaqstan oblysy