Bas bapker týrnırge jaqsy daıyndyqpen bara jatqanyn jáne basty maqsat – birinshi oryn ıelený ekenin aıtty. Sondaı-aq qarsylastardy jetkilikti deńgeıde zerttegenin de jetkizdi.
– Oqý-jattyǵý jıyny josparǵa sáıkes ótti. Alǵashqy kúni aýa raıynyń qolaısyzdyǵyna sáıkes sál ózgerister engizdik. Qazirgi tańda Qazaqstan Eýropa elderi arasynda tórtinshi orynda tur. Álem reıtınginde jetinshimiz. Mundaı jarystarda birinshi orynnan basqa maqsat bolmaýy tıis. Qarsylastardyń barlyǵyn qurmetteımiz. Alaıda basty mindet – birinshi oryn alý. Alǵashqy qarsylas – Rýmynııa. Sońǵy ret osy eldiń oıynshylarymen oınadyq. Sol sebepti maǵlumat jetkilikti. Slovenııa iri týrnırlerge jıi qatysatyn sheber komanda. Chehııa óz alańynda ótetin oıyndardy jaqsy ótkizedi. Ulttyq quramada basty rólge shyǵa qoımaǵan oıynshylar bar. Máselen Orazov pen Tursaǵulov. Sonymen qatar Albert Aqbalyqov jáne Azat Valıýllın syndy jańa oıynshylardyń oıyny qarsylastar úshin yńǵaısyzdyq týdyrýy yqtımal, – deıdi Rıkardo Kaka.
Qazaqstannyń fýtzal quramasynyń kapıtany Dinmuhambet Súleımenov ishki chempıonattyń deńgeıi óskenin aıtyp, álem birinshiliginen keıin karerasyn aıaqtaıtynyn málimdedi.
– Ishki chempıonattaǵy komandalardyń kóp bolýy jáne básekelestiktiń ósýi bizdiń ulttyq quramaǵa oń áser etedi. Sebebi elimizdiń jas ta, talantty fýtzalshylaryna jol ashylyp, basqa fýtbolshylardyń sheberligin arttyrýǵa múmkindik beredi, – dedi qurama kapıtany.
Maýsym sońynda jaraqat alyp, biraz ýaqyt qatardan shyǵyp qalǵan qaqpashy Igıta áli tolyq babyna enbegen. Biraq elıtalyq kezeńde jeńiske jetý úshin barymdy salamyn deıdi.
– Maýsym sońynda buryn-sońdy bolmaǵan jaraqat alyp qaldym. Qazirgi ýaqytta júz paıyz daıynmyn dep aıta almaımyn. Alaıda ynta-jigerdiń arqasynda jetistikke jetýge bolady. Qazaqstanda alańdaǵy oıynshylar ǵana emes, qaqpashylardyń da deńgeıi artyp keledi. Buryn-sońdy deńgeıi joǵary qaqpashylar bolmaǵan edi. Báseke artyp, qaqpashylar aıaqpen de oınaı bastady. Nurálem Baıdollanyń oıyn sapasy óte joǵary. Batyl qımyldaıdy. Aıaqpen de jaqsy oınaıdy. Bolashaǵy zor qaqpashy. Dál osyndaı sózderdi Aleksandr Gýrovke de aıta alamyn. Qazaqstanda jas qaqpashylar kóp. Olar úshin eń bastysy – turaqtylyq. Tórt-bes jyldan keıin meniń oıyn úlgimdegi qaqpashylar shyǵyp, ulttyq quramaǵa kómektesedi dep oılaımyn, – deıdi qaqpashy.
Aıta keteıik, fýtzaldan Qazaqstan quramasy Chehııanyń Brno qalasynda 2020 jylǵy álem chempıonatynyń fınaldyq kezeńinde oınaý úshin elıtaly kezeńde Rýmynııa, Slovenııa jáne Chehııa quramalarymen synǵa túsedi. Elimizdiń fýtbolshylary qatysatyn týrnırdi Qazaqstan Fýtbol federasııasynyń YouTube arnasynan jáne «Qazsport» telearnasynan tamashalaýǵa bolady. Jankúıerler Rýmynııa jáne Slovenııa quramasyna qarsy ótetin oıyndy federasııasynyń YouTube arnasynan, al Chehııamen ótetin sońǵy oıynda «Qazsport» telearnasynan tamashalaı alady.
