Osyǵan baılanysty Kardıologııa jáne ishki aýrýlar ǵylymı-zertteý ınstıtýtynda 2019 jyldyń tamyz aıynan beri endokrınolog, gastroenterolog, nefrolog, kardıolog, pýlmonolog jáne allergolog mektepteri ashyldy. Bul mektepter – naýqastardyń emdelýge, óz densaýlyqtaryn nyǵaıtýǵa degen yntalaryn qalyptastyrý, pasıenttiń óz densaýlyǵy men ómir súrý sapasyna degen jaýapkershiligin arttyrý, medısına qyzmetkeri men pasıenttiń arasynda emdeý men ońaltýdyń tıimdiligine qol jetkizýdegi yntymaqtastyqty qamtamasyz etýdi kózdeıdi. Iаǵnı, densaýlyq mektebi emdeý men ońaltýda tıimdilikke qol jetkizýdegi dáriger men pasıent arasyndaǵy yntymaqtastyqty qamtamasyz etedi.
Osy ýaqytta 366 naýqasqa dáris oqyldy. Oqý sabaqtarynda olarǵa arterııalyq qan qysymyn tekserý tehnıkasy, 2-tıptegi qant dıabetindegi tamaqtaný qaǵıdattary men dene qımylynyń júktemelerin, ózin-ózi baqylaý jáne óz ózine kómek kórsete bilý, ishek, óńesh, asqazan aýrýlary kezinde qalaı tamaqtaný kerektigi, koronografııa jasaýǵa qandaı kórsetkishter men qarsy kórsetkishterdiń bolýy týraly jáne basqa da sharalar júrgizý úıretildi.
Oqytý sabaqtarynda alynǵan bilim men daǵdylar pasıentterdiń óz syrqatyna qatysty: qaýip faktorlary, onyń damýy men asqynýlary týraly aqparattanýyn arttyrýǵa múmkindik berdi. Eń mańyzdysy – pasıenttiń sana-sezimine óziniń tek «dári ishýshi» nemese «prosedýralardy qabyldaýshy» ǵana emestigin uǵyndyrý arqyly – emdeý prosesine óziniń de qatysýy qajet ekenin qalyptastyrý kerek. Sondaı-aq pasıenttiń týǵandary da onyń qaıta qalpyna kelý jáne ońaltý sharalaryna qatysýy tıis.
Sonymen birge medısına qyzmetkerleriniń ózderi de oqýdan ótti. Máselen, Búkilálemdik júrek kúni sheńberinde ınstıtýt meıirgerleri Almaty qalasy emhanalarynyń orta medısına personalyna semınar ótkizip, oǵan 27 meıirger qatysty. Elimizdiń barlyq aımaqtaryndaǵy MSAK meıirgerleri úshin «Aýrýlardy basqarý baǵdarlamasy boıynsha medısınalyq-sanıtarlyq alǵashqy kómek kórsetýdegi meıirgerlerdiń róli» atty eki kúndik semınar ótkizildi. Bul dárister ABB tıimdi engizýdiń daǵdylaryn odan ári jergilikti oryndarda «kaskadtyq ádispen» ótkizýge MSAK meıirgerleriniń jattyqtyrýshylaryn úıretip, daıyndaıdy.
