Atap aıtqanda, dıplomat sońǵy jyldary Qazaqstannan Sharm al-Sheıh pen Hýrgadaǵa tikeleı charterlik reıster ashylýynyń arqasynda Mysyr kýrorttaryna keletin qazaqstandyq týrısterdiń sany edáýir artqanyn aıtty. Bıyldan bastap Mysyrda keńinen júrgizilip jatqan aqparattyq-jarnamalyq kampanııanyń arqasynda mysyrlyq týrısterdiń bizdiń elge kelýge degen qyzyǵýshylyǵy da artýda. Osyǵan oraı Elshi eki el arasyndaǵy týrıstik aǵymdy keńeıtý úshin mysyrlyq áýekompanııalardyń Qazaqstanǵa tikeleı áýe reısterin ashýǵa qolǵabys berýdi surady. H.Ál-Annanı MAR Azamattyq avıasııamen birlesip bul máseleni jaqyn arada sheshýge ýáde etti. Mınıstrdiń aıtýynsha, qosymsha reısterdiń ashylýy tek ózara týrızmniń ósýine ǵana emes, eki el arasyndaǵy bıznes qatynastary men saýda-ekonomıkalyq yntymaqtastyqtyń jandanýyna serpin beredi.
Buǵan qosa A.Isaǵalıev Uly Dala Eliniń dańqty perzenti Sultan Beıbarystyń Kaırdegi meshitin qalpyna keltirý jumystaryn jańǵyrtqany úshin Mysyrdyń Úkimeti men Kóne eskertkishter jáne týrızm mınıstrligine zor alǵys bildirdi. Qazirgi kezde jumystar qarqyndy júrgizilýde. Bul jobanyń bas merdigeri – Mysyr men Taıaý Shyǵystaǵy eń iri Arab Contractors qurylys kompanııasy ókilderiniń aıtýynsha, meshitti restavrasııalaý jumystary tolyǵymen 2020 jylǵy shildede aıaqtalýy tıis. Sultan Beıbarys meshiti – Kaırdegi aıtýly tarıhı oryndardyń biri. Bul ǵımarattyń turǵyzylǵanyna 8 ǵasyrǵa taıaý ýaqyt ótken. Meshittiń uzyndyǵy – 108, al eni – 105 metr. Dýal retinde qalanǵan tas qabyrǵalarynyń bıiktigi 11 metrge jýyq.
2007 jyly elimiz Sırııa astanasy Damaskidegi Beıbarys Sultan kesenesin qaıta qalpyna keltirýdi, osy ejelgi Sham shaharynda dańqty babamyz ál-Farabıdyń tarıhı-mádenı ortalyǵy men kesenesin salýdy, mysyrlyq Kaırde Beıbarys Sultan meshitin qalpyna keltirýdi qolǵa alyp, qarjy bóldi. Bul táýelsiz Qazaqstan tarıhyndaǵy shet memlekettiń aýmaǵynda turǵyzylǵan tuńǵysh iri mádenı obektilerimiz bolyp esepteledi. Bul eskertkishterdiń barlyǵy tek Qazaqstan, Sırııa jáne Mysyr úshin ǵana emes, sondaı-aq, Shyǵys jáne Eýropanyń birqatar eli úshin de zor tarıhı-mádenı mańyzǵa ıe. Mysyrda týyndaǵan saıası-ekonomıkalyq ahýalǵa, revolıýsııadan keıingi kúızelisterge baılanysty bul is toqtatylǵan.
Elimizdiń Syrtqy ister mınıstrliginiń dereginshe, meshitti restavrasııalaý jobasynyń qazirgi jalpy quny 12 mıllıon AQSh dollaryn quraıdy. Onyń 4,5 mıllıonyn Qazaqstan úkimeti kezinde bóldi. Mysyr bolsa, qosa qarjylandyrý maqsatynda 100 mıllıon egıpettik fýnt (shamamen 5,6 mıllıon dollar) aýdarǵan. Qazaqstan elshisi Arman Isaǵalıevtyń aıtýynsha, bas merdiger men Mysyrdyń Kóne eskertkishter mınıstrligi arasynda jobanyń qunyna qatysty buǵan deıin bolǵan daýlar Mysyr premer-mınıstriniń jeke aralasýy arqasynda sheshimin tapty.
