Sońǵy týrda jerlesterimiz jarys qojaıyndary ári topta kósh bastap turǵan Chehııa quramasymen kezdesti. Chehııa – Qazaqstan arasyndaǵy oıynǵa deıin bizdiń toptaǵy Rýmynııa men Slovenııa quramalary synǵa túsip, eki qurama 4:4 esebimen teń oınady. Bul matchtyń teń nátıjemen aıaqtalǵany Qazaqstan quramasy úshin tıimdi edi. О́ıtkeni Chehııany jeńetin bolsa, birden álem chempıonatyna joldama alýshy edi. Jáne solaı da boldy. Kezdesý bastala sala oıyn tizginin qoldaryna alǵan jerlesterimiz nebári tórt mınýttyń ishinde qarsylas qaqpasyna 3 gol soqty. 3-shi mınýtta Dýglas dýbl avtory atansa, arada bir mınýt ótkende Taınan úshinshi goldy soqty. Birinshi taım – 3:0 esebimen aıaqtaldy.
Ekinshi taımdy da jerlesterimiz sátti bastady. 23-mınýtta Dýglas oıyndaǵy úshinshi, Qazaqstan quramasynyń tórtinshi golyn soqty. Al 36-mınýtta Chehııa quramasy esepti qysqartýǵa múmkindik aldy. Gol avtory – Mıhal Goly. Biraq arada eki mınýt ótkende Taınan besinshi goldy soǵyp, Qazaqstan quramasyna tarıhı jeńis syılady. Oıyn aıaqtalar tusta qaqpashy Igıtanyń qateliginen keıin chehııalyq Irjı Vokoýn bizdiń qaqpaǵa ekinshi goldy soqty. Qorytyndy esep – 5:2. Osylaısha Qazaqstan quramasy bıyl 12 qyrkúıek pen 4 qazan aralyǵynda Lıtvada ótetin álem chempıonatyna joldama aldy.
