Onlaın daýys berý júıesi alǵash ret «8D032-Jýrnalıstıka jáne aqparat» kadrlardy daıarlaý baǵytyndaǵy «6D050400-Jýrnalıstıka» mamandyǵy boıynsha dıssertasııalyq keńeste qoldanyldy. Doktorant Alma Saılaýqyzy «Qazaq qoǵamyn demokratııalandyrý men ult birligin nyǵaıtýdaǵy Alash kósemsóziniń róli» taqyrybyndaǵy dıssertasııasyn sátti qorǵap, alǵash ret onlaın daýys berý arqyly PhD fılosofııa doktory ǵylymı dárejesine laıyq dep tanyldy.
Dıssertasııalyq keńes májilisine doktoranttyń sheteldik ǵylymı keńesshisi, Fransııadaǵy Eýropalyq qoǵammen baılanys ınstıtýtynyń professory T.Iý.Lebedeva, keńes múshesi Sankt-Peterbýrg memlekettik ýnıversıteti jýrnalıstıka jáne buqaralyq kommýnıkasııa joǵary mektebiniń bıznestegi qoǵammen baılanys kafedrasynyń meńgerýshisi, áleýmettaný ǵylymdarynyń doktory, professor D.P.Gavra ǵylymı zertteý jumysyna joǵary baǵasyn berdi. Sheteldik áriptester Skype arqyly qosylyp, Alashtaný ǵylymyna qosylǵan jańa zertteýdiń ózektiligin erekshe atap ótti. Professor T.Iý.Lebedeva ulttyq brend retinde usynylǵan Alash qaıratkerleriniń ustanymy memleket damýyndaǵy mańyzy zor qundylyq ekenin atap ótti. Sondaı-aq Parıj baspasynan atalǵan eńbekti jaryqqa shyǵarýǵa usynys bildirdi.
Professor D.P.Gavra ulttyq biregeılikti qalyptastyrýdaǵy Alash qaıratkerleriniń eńbekterin qazirgi saıası, ıdeologııalyq, mádenı kontekste taldaǵan doktorant A.Saılaýqyzynyń zertteý ádisterin utymdy paıdalanýyn erekshe atady. Dıssertasııalyq keńestiń basqa da músheleri men resmı resenzentteri doktorant jumysyna jan-jaqty pikir bildirdi.
Jýrnalıstıka jáne aqparat kadrlar daıarlaý baǵyty boıynsha alǵashqy PhD fılosofııa doktory dıplomyn EUÝ-diń ǵylymı-zertteý jumystary jónindegi prorektory, t.ǵ.d. Gúlnár Tynyshbaıqyzy Merzadınova, ǵylymı kadrlar men postdoktorantýrany attestattaý bólimniń bastyǵy, f.ǵ.k. Maınur Ábiltaıqyzy Bóribaeva doktorant A.Saılaýqyzyna arnaıy tabystady. Saltanatty sharaǵa dıssertasııalyq keńes tóraǵasy, jýrnalıstıka jáne saıasattaný fakýltetiniń dekany, professor Qaırat О́mirbaıuly Saq, dıssertasııalyq keńes músheleri jáne oqytýshy-professorlar quramy men doktoranttar qatysty.
Ǵylymı-zertteý jumystary jónindegi prorektor G.T.Merzadınova PhD doktory dárejesin alǵan A.Saılaýqyzyn ýnıversıtet basshylyǵy tarapynan quttyqtap, búgingi kúndegi bilim men ǵylymnyń mańyzynyń zor ekendigine toqtaldy. Sondaı-aq zertteý jumysy boıynsha doktoranttyń Scopus málimetter bazasyna kiretin jýrnaldarda 3 maqala jarııalaýyn úlken jetistik retinde baǵalady.
Bir aıta keterligi, jýrnalıstıka salasyndaǵy bolashaq ǵylym doktorlarynyń jumysyn saraptaıtyn dıssertasııalyq keńes óz jumysyn bastaǵaly kóp bolǵan joq. EUÝ rektorynyń buıryǵymen óz jumysyn bastaǵan bul keńes osy mamandyqta bilim alǵan doktoranttarymyzǵa jol ashyp, úlken múmkindik týǵyzyp otyr. Dıssertasııalyq keńes músheleriniń barlyǵy derlik halyqaralyq Web of Science nemese Scopus málimetter bazasyna kiretin jýrnaldarda sońǵy 5 jylda birneshe maqalalary jaryq kórgen, Hırsha ındeksi bar ǵalymdar. Mundaı joǵary talapqa saı keletin sala mamandarynan jasaqtalǵan dıssertasııalyq keńester respýblıkamyz boıynsha neken-saıaq.
Gúlmıra ÁShIRBEKOVA,
L.N.Gýmılev atyndaǵy Eýrazııa ulttyq ýnıversıtetiniń dosenti, f.ǵ.k.
