Kezdesýge kóp balaly analar, sonymen qatar aýdan ákimderiniń orynbasarlary, basqarmalardyń basshylary qatysty. Talqylaý barysynda kóp balaly jáne az qamtylǵan otbasylarǵa qoldaý kórsetý, onyń ishinde eńbekpen qamtý, jeke kásipkerlik jáne materıaldyq bazany keńeıtý, turmys jaǵdaıyn jaqsartý, basqa da máseleler boıynsha oqytý jumystaryn júrgizý, qosymsha úıirmeler men kreatıvti seksııalar ashý máseleleri qaraldy.
Búgingi kúni «Baqytty otbasy» ortalyqtary kásibı baǵytta jumys jasap, áleýmettik jáne qarjylyq-motıvasııalyq qoldaý kórsetýge umtylyp otyr. Qajetti mamandyqtar men kásipke úıretýde «Isker ana» baǵdarlamasy qolǵa alynyp, bıznes negizderin úıretý jóninde kómek kórsetedi.
Ákimniń orynbasary E.Babaqumarov kóp balaly otbasylarǵa qoldaý kórsetý sharalarynyń áleýmettik mańyzdylyǵyn atap ótti. 2019 jyldyń tamyzynan bastap, aýdandyq «Baqytty otbasy» ortalyqtarynda 10 myńǵa jýyq almatylyq otbasy aqparattyq-keńestik jáne resýrstyq, ádistemelik jáne zańnamalyq kómek aldy, sonymen qatar ana men balanyń salaýatty ómiri kabınetterinde boldy. 2800-den astam adam grantqa qol jetkizip, ózderiniń jeke bıznesterin ashty.
«Bizdiń qalamyzdaǵy eń belsendi jandar – áıelder. Sondyqtan, dıalogtyq alań qurý qajet, onyń arqasynda ortalyqtardyń jumystary júıelendiriledi, eń bastysy ózekti problemalar sheshimin tabatyn bolady», – dedi Almaty qalasy ákiminiń orynbasary E.Babaqumarov.
Qala ákiminiń orynbasary S.Tuıaqbaev Almaty ákiminiń tapsyrmasy boıynsha qalada taǵy da eki «Baqytty otbasy» áleýmettik ortalyqtaryn ashýdyń josparlanǵanyn, granttar sanynyń artatynyn habarlady.
Kezdesýdiń nátıjesinde, áleýmettik ortalyqtardyń jumystarynyń sapasyn odan ári jaqsartý maqsatynda, kópbalaly jáne az qamtylǵan otbasylar men birigip, jumys isteý úshin jumys tobyn qurý týraly sheshim qabyldandy. Kóterilgen barlyq máseleler men aıtylǵan usynystardy naqtyly sheshimin tabý úshin jumys toby jete zertteıtin bolady.
