«Barys Arenada» ótken «N» tobyndaǵy básekelerde bizdiń hokkeıshiler alǵashqy eki oıynda qarsylastarynan iri eseppen basym túskenimen, sońǵy oıynda Polsha quramasyna ese jiberdi. Birinshi matchta Andreı Skabelka shákirtteri álemdik reıtıngte 25-orynda turǵan Ýkraına quramasyn 8:1 esebimen tize búktirdi. Ekinshi kezdesýde jerlesterimiz 28-orynda turǵan Nıderland quramasymen kezdesip, 7:1 nátıjesimen jeńiske jetti.
Al sheshýshi kezeńde Qazaqstan men Polsha quramalary kezdesti. Eki komandanyń da enshisinde eki jeńis bolǵandyqtan, jeńgen qurama Olımpıadaǵa irikteý týrnıriniń negizgi bóliginde kúsh synasý qurmetine ıe bolatyn edi. Tartysty ótken kezdesýde polshalyq hokkeıshilerdiń baǵy jandy. Qarsylastar alǵashqy eki kezeńde jaýapsyz eki shaıba soǵyp, alda turdy. Keıin bizdiń hokkeıshiler tarazy basyn teńestirgen-di. Alaıda matchtyń aıaqtalýyna 30 sekýnd qalǵanda polıaktar gol soǵyp, 3:2 esebimen jeńip ketti.
Osylaısha, jerlesterimiz 2022 jylǵy Beıjiń Olımpıadasyna qatysý múmkindiginen aıyryldy. Irikteý týrnırde top jarǵan Polsha quramasy lısenzııa úshin talasty jalǵastyrady.
