Ýaqyt uzaǵan saıyn qashqyn olıgarh Muhtar Ábilázovtiń aqsha urlaý odısseıasyndaǵy alýan qyrly qımyldary birtindep aıǵaq bolyp jatyr. Onyń bul joldaǵy «erlik isteri» Qazaqstannyń BTA bankisinen urlap ketken 6 mlrd. AQSh dollarymen ǵana shektelip qalmapty, osy aralyqta sonymen qatar, birqatar shet memleketterdiń bankilerin údere úptep, taqyrǵa otyrǵyzyp ketken eken.
Bulardyń aldyńǵy qatarynda Brıtanııanyń HSBC, Standard Chartered, RBS jáne Barclays dep atalatyn qarjy mekemeleri turǵan kórinedi. Bizdiń eks-bankırdiń mundaǵy áriptesterinen alyp ketken aqshasynyń jalpy somasy 500 mln. dollardy quraıdy. Budan basqa, aq qaǵazdy aıǵyzdaı salyp, aqshaǵa aınaldyra beretin jerden shyqqan jiti qý Muhtar Ábilázovtiń jelisi boıynsha túsirilgen «Mańǵyt, aýzyńa sańǵyt» serııasynyń keıipkerleri bolǵandar sapynda Italııanyń 8 bankisi de sabylysyp júr. Olardyń ishinde bylaıǵy adamnyń túsine kirse de, tisine týra kele qoımaıtyn Unicredit, Banca Monte dei Paschi di Siena jáne Mediobanca deıtin alpaýyttary bar. Bular Muhtardyń qarmaǵy ushyna 250 mln. AQSh dollaryn ózderi baryp ilindirip jibergenge uqsaıdy.
Qazirgi kúnderi Ábilázovke berip jibergenderi bularǵa qaraǵanda edáýir az bolyp kórinetin birqatar fransýz bankteriniń qojaıyndary mańdaılarynyń terin bes súrtip, shúkirshilik aıtyp otyrǵan sekildi. Qansha degenmen, endi 50 mln. dollar aqsha degen báribir 500 mln. dollardyń dorbasyna shaq kele qoımaıdy ǵoı. Al sol 50 mıllıondy bizdiń «batyr bala» Fransııanyń BNP Paribas, Societe Generale, Credit Agricole jáne BPCE degen bankilerinen alyp ketipti. Bulardyń syrtynda Shveısarııanyń Credit Suisse, nemistiń Commerzbank jáne Amerıkanyń Wells Fargo deıtin bankileri taǵy tur.
Osylarǵa qaraı otyryp, bul jaryqtyq osynshama eldiń osynshama bankilerinen osynshama aqshany qaı ýaqytta alyp úlgere bergen dep qaıran qalasyń. Solardy elekten ótkize kelip, bul Muhtar Ábilázov degeniń shynynda da naǵyz daýasyz alaıaq eken ǵoı, degen oıǵa eriksiz kelesiń.
Sáken MAILYBAI.
