«Ulttyq quramany basqarý usynysyn tennıs federasııasynyń prezıdenti Bolat О́temuratovtan qabyldaý – men úshin úlken qurmet. Bul – ózimdi jańa baǵytta, ıaǵnı ári kapıtan, ári oıynshy retinde synap kórýge keremet múmkindik. Sonymen qatar bul úlken jaýapkershilik, sol sebepten men Federasııa basshylyǵy artqan senimdi aqtaý úshin barymdy salamyn», deıdi Iаroslava Shvedova.
Otandasymyz azdaǵan úzilisten soń bıyl úlken sportqa qaıta oralyp, jýyrda ǵana Belgııada ótken Federasııa Kýbogynyń irikteý kezeńine qatysqan-dy. Shvedova «Úlken Dýlyǵa» sanatyndaǵy Ýımbldon jáne US Open-2010 týrnıriniń juptyq sanatta jeńimpazy, sondaı-aq bes ret iri dodanyń fınalısi atandy (tórteýi – juptyq sanatta, bireýi – mıkste). Sonymen qatar WTA sanatyndaǵy jalpy sany 15 týrnırdiń bas júldesin oljalaǵan (onyń bireýi – jekeleı sanatta).
