28 aqpan kúni bokstan Qazaqstan quramasy Tokıo Olımpıadasyna joldama beretin Azııa jáne Tynyq Muhıt aımaǵy irikteý týrnırine attanady. Amman sharshy alańynda lısenzııa úshin 52 kıloda álem chempıonatynyń qola júldegeri Sáken Bıbosynov, 57 kıloda birneshe halyqaralyq týrnırlerdiń jeńimpazy Serik Temirjanov baq synaıdy. 63 kılo salmaqta Azııa chempıonatynyń kúmis júldegeri Zákir Safıýllınge senim artylǵan.
«Qazaqtyń salmaǵy» atanyp ketken 69 kıloda álem chempıonatynyń eki dúrkin qola júldegeri Abylaıhan Júsipov judyryqtasady. 75 kıloda bapker tańdaýy álem chempıonatynyń jáne Azııa oıyndarynyń kúmis júldegeri Ábilhan Amanqulǵa, 81 kıloda 2019 jylǵy álem chempıony Bekzat Nurdáýletovke túsken. Al 91 kıloda Rıo Olımpıadasynyń kúmis júldegeri Vasılıı Levıt pen asa aýyr salmaqta qurama kapıtany, álem chempıonatynyń eki márte kúmis júldegeri Qamshybek Qońqabaev joldamaǵa talasady.
«2020 jylǵy Tokıo Olımpıadasynyń joldamasyna talasatyn jigitterdiń barlyǵy óz salmaǵynda myqty sanalady. Barlyǵy da tájirıbeli boksshylar. Árqaısysy ózin jaqsy jaǵynan kórsete alady», dedi bas bapker Ǵalymbek Kenjebaev.
Týrnırde boksshylarǵa 63 joldama beriledi. Mysaly, 52, 57 jáne 60 kılo salmaqtaǵy boksshylarǵa 6 joldama, ıaǵnı jartylaı fınalǵa shyqqan 4 jáne shırek fınalda jeńiske jetken eki myqty boksshy joldamaǵa ıe bolady. Al 69, 75 jáne 81 kılo salmaqtaǵy boksshylarǵa 5 joldama beriledi. 91 jáne 91 kılodan joǵary salmaqtaǵy boksshylarǵa 4 joldama qarastyrylǵan. Iаǵnı jartylaı fınalǵa shyqqan tórt boksshy Tokıoǵa barady. Qalǵan joldamalar qyzdar boksyna tıesili.
Aıta ketelik, Tokıo Olımpıadasyna irikteý týrnıri 3-11 naýryz aralyǵynda Iordanııanyń Amman qalasynda ótedi.
