Áıel kásipkerligi men áleýmettik máselelerge arnalǵan dıalog alańynda kásipkerlermen birge tájirıbeli sarapshylar qatysyp, óz oılaryn ortaǵa saldy.
«Atameken» UKP Iskerı áıelder keńesiniń tóraıymy Lázzat Ramazanova: «Bizdiń elimizde áıelder bızneske qulshyna kirisip otyr, muny statıstıkalyq málimetter de rastaıdy. Almatydaǵy bıznestiń 45%-yn áıelder basqarady: qyzmet júrgizip turǵan 174,5 myń shaǵyn jáne orta kásipkerlik sýbektisiniń 78 myńyna áıelder jetekshilik etedi. Respýblıka boıynsha bul kórsetkish 43%-ǵa teń (1,2 mıllıon kásipkerdiń ishinde 536 myńy áıelder). Olar ótken jyly «Atameken» uıymdastyrǵan bıznes-oqýyna úlken qyzyǵýshylyq tanytty. «Eńbek» memlekettik baǵdarlamasy aıasynda Qazaqstanda 75 myń adam oqýdan ótti, olardyń 40,7 myńy (54%) – qyz-kelinshekter. «Bastaý» jobasy boıynsha kýrstan ótken 55 myń adamnyń ishinde 30,5 myńy (55%) taǵy da áıelder. «Jas kásipker» jobasy aıasynda 20 myń túlektiń ishinde 10 myńnan asa jas áıel bar (51%)», dedi.
«Áıelder bıznesin qoldaýǵa arnalǵan quraldar» taqyrybyndaǵy paneldik pikirtalasqa «Qazaqstan Halyq banki» AQ basqarma tóraıymy Úmit Shaıahmetova, «Turǵyn úı qurylys jınaq banki» AQ basqarma tóraıymy Lázzat Ibragımova, sondaı-aq, «Damý» Kásipkerlikti damytý qory» AQ jáne Eýropalyq qaıta qurý jáne damý bankiniń ókilderi qatysty.
«Fashion ındýstrııa kreatıvtik ekonomıkanyń qozǵaltqyshy retinde» dep atalatyn sessııa kezinde dızaın-ónimniń el ekonomıkasyna qosatyn úlesi jalpy ishki ónimdegi paıyz kórsetkishi arqyly emes, osy dızan-ónim arqasynda qalyptasatyn jańa mádenı paradıgma deńgeıimen, sondaı-aq, qazaqstandyqtar arasynda jáne shetelde el ımıdjiniń kóterilýimen baǵalanýy tıis degen ıdeıa aıtyldy.
«Almaty qalasy bul turǵyda alǵanda jaýapkershiligi joǵary mindetti atqaryp otyr: dál osynda elimizdegi basty kreatıvtik ónimder dúnıege keledi, sondyqtan qalany damytý kezinde dál osy salany qoldap damytýǵa basty nazar bólinýi tıis», – dedi Mimioriki balalar kıimi brendiniń negizin qalaýshy Inna Apenko.
Sonymen qatar, Forým alańynda bıznes tıimdiligin kóterý, sonyń ishinde, áıelder bıznesine arnalǵan Agile-tuǵyr, jekebas transformasııasynyń bıznes tabysyna yqpaly, salyq zańnamasyndaǵy basty ózgerister syndy taqyryptarǵa arnalǵan sheberlik sabaqtary men praktıkýmdar ótti.
«Biz bul forýmdy ekinshi márte ótkizip otyrmyz. Qazirdiń ózinde bul is-sharanyń bıznes-qaýymdastyq úshin zor paıdasyn kórip, úlken suranysqa ıe ekendigin baıqap otyrmyz. Jaǵdaıǵa obektıvtik taldaý jasaý, isker ortaǵa qatysty usynystar men tájirıbelik mashyqtar, munyń barlyǵy bizdiń jobany tabysty ári naryq úshin qajetti ettip otyrǵan faktorlar dep oılaımyn», – deıdi Almaty qalasy boıynsha Iskerı áıelder keńesiniń tóraıymy, Qazaqstan Baspasóz klýbynyń prezıdenti Ásel Qaraýylova.
