Bas bapker Andreı Skabelka Gagarın kýbogynyń pleı-off kezeńi aldynda komandanyń negizgi quram oıynshylaryna demalys berip, syrt aıdyndaǵy oıynǵa klýbtyń tek qazaqstandyq hokkeıshilerden quralǵan ekinshi quramyn alyp bardy. «Barys» jas oıynshylarmen jasaqtalsa da, bapker men jankúıerleriniń senimin aqtaı bildi. Kezdesýdi joǵary qarqynmen bastaǵan jerlesterimiz alǵashqy 7 mınýtta «Admıral» qaqpasyna jaýapsyz úsh shaıba soqty. Alǵashqy 4-mınýtta Valerıı Orehov mergendigimen kózge tússe, 6-mınýtta Pavel Akolzın esepti eseledi. Arada bir mınýt ótkende Egor Petýhov «Barystyń» úshinshi shaıbasyn soqty. Ekinshi kezeńniń 33-mınýtynda Orehov dýbl avtory atanǵan-dy. Biraq tóreshiler vıdeo qaıtalaýdan soń goldy eseptemeı tastady. Kezeń aıaqtalar tusta «Admıral» hokkeıshisi Konstantın Glazachev komandasynyń oıyndaǵy jalǵyz shaıbasyn soqty. Úshinshi kezeńde komandalar gol soqqan joq. Qorytyndy esep – 3:1.
«Barys» bul jeńisinen keıin turaqty birinshiliktiń týrnır kestesinde 84 upaımen ekinshi orynǵa kóterildi. Jerlesterimiz kelesi kezdesýin erteń Habarovskiniń «Amýr» komandasyna qarsy ótkizedi.
