Qoryqshylarǵa qos kater tartý etildi

Aımaqtar • 25 Aqpan, 2020

Qoryqshylarǵa qos kater tartý etildi

52 ret kórsetildi

Tabıǵatty qaskóılerden qorǵaý – mańyzdy sharýa. Ońaı oljaǵa kóz tigip, qol salatyndar tabıǵat baılyqtaryna ǵana emes, ony qorǵaýshy qoryqshylardyń ómirine qaýip tóndirip júrgeni belgili. Osy oraıda qoryqshylardy qajetti quraldarmen jan-jaqty qamtamasyz etip, jumys barysynda utqyrlyǵyn ushtaı túsýdiń mańyzy zor.

Gúlaıym DÁÝITBAI

Munaıly ólkedegi Qyzylsaı memlekettik óńirlik tabıǵı parki Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasyna qaraıdy. «Qyzylsaı» mekemesiniń qyzmeti – tıisti erekshe qorǵalatyn tabıǵı aýmaqtardaǵy janýarlar dúnıesi men ósimdik túrlerin qorǵap, qorshaǵan ortanyń búlinbeýi men brakonerlerge qarsy jumystar júrgizý. Mekemeniń quramynda bir óńirlik park jáne jergilikti mańyzdaǵy alty qaýmal bar. Solardyń biri – Kaspıı teńizimen shektesetin «Adamtas» qaýmaly. Shekteý aýmaǵy – 38 shaqyrym. Teńizge engen aral 0.4 aýmaǵy boıynda ornalasqan. Aýmaqqa Kendirli múıisiniń soltústigindegi usaq araldar kiredi. Atalǵan aralda jáne teńiz aýmaǵynda respýblıkalyq dárejedegi Kendirli demalys orny ornalasqan. Bul aýmaqtar Qyzyl kitapqa engen ıtbalyqtyń shoǵyrlanǵan aýmaǵy jáne balyqtar men erekshe kezdesetin sýasty ósimdikteri bar. Qustar úshin kóktemgi jáne kúzgi mezgilderde ushyp kelý jáne ushyp ketý mekeni. Alaıda, qazirgi tańda qaskóılerdiń teńiz arqyly arnaıy qaıyqtarmen kelip, balyqtardy zańsyz aýlaý faktileri kórinis taýyp otyr. О́kinishtisi, bul tek búginniń emes, bertinge deıin jalǵasyn taýyp kele jatqan qylmys. Inspektorlardyń qarsy turýyna arnaıy tehnıkalardyń bolmaýy qolbaılaý bolyp keldi. Iаǵnı, atalǵan aralda tabıǵat baılyqtaryn qorǵaý sý kólikterin kópten beri qajet etip kelgen bolatyn. Jańalyqqa «Teńizshevroıl» JShS-men kelissózder júrgizýdiń nátıjesinde qol jetti. Atalǵan kompanııa «Qyzylsaı» memlekettik óńirlik tabıǵı parki» kommýnaldyq memlekettik mekemesine teńizde tez júrgish eki katerdi syıǵa tartty. Basqarý taqtasy alıýmınııden jasalǵan Kazboat markaly kemelerdiń árqaısysynyń syıymdylyǵy 500 kıloǵa deıin júk kótere alady. Endi tabıǵat qorǵaýshylarǵa kúnniń ystyǵy men sýyǵyna qaramaı óz qyzmetterin alańsyz atqarýǵa jaǵdaı jasaldy. Kompanııanyń bul tabıǵat qorǵaýshylarǵa alǵashqy kómegi emes eken. Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasy men «Teńizshevroıl» JShS arasyndaǵy jemisin bergen kelissózder alǵash ret 2019 jyldyń 22 tamyzynda bastaý alǵan. Ol kezde «Teńizshevroıl» JShS «Qyzylsaı» mekemesine 7 vagon-úı, 22 fototuzaq pen 2 dron syıǵa tartypty.

Bul joly katerlerdi tabystaǵan shara Aqtaý qalasy «Brız» ıahta klýbynyń aýmaǵynda ótti. Oblys ákimdiginiń, aýmaqtyq orman sharýashylyǵy jáne janýarlar dúnıesin qorǵaý ınspeksııasy, ekologııa departamenti, «Qyzylsaı» mekemesi, Batys aımaǵy Kaspıı teńizindegi memlekettik shekara qyzmeti 22/01 A áskerı bólimi, tabıǵat paıdalanýshylar, balyq sharýashylyǵy qaýymdastyǵynyń ókilderi qatysqan sharada Mańǵystaý oblysynyń tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekov qoryqshylarǵa qol ushyn bergen jáne áleýmettik turǵyda óńirdiń turmys jaǵdaıy men tabys kózine asa mán berip, birshama qyzmet atqaryp júrgen «Teńizshevroıl» kompanııasyna alǵysyn bildirse, «Teńizshevroıl» JShS Úkimet jáne jurtshylyqpen baılanys bóliminiń bas menedjeri Rızabek Artyǵalıev ekijaqty kelisim men tabıǵatty qorǵaýdyń mańyzyn sóz etti.

– Byltyr quny 45 mln teńgeni quraıtyn qural-jabdyqtardy syıǵa tarttyq. Biz ózimiz syılaǵan jabdyqtardyń paıdasy týraly estip, qýanyp qalamyz. О́ńirdegi ekojúıeni saqtaýǵa atsalysý biz úshin de mańyzdy, – dedi R.Artyǵalıev.

Zańdy belinen basyp, tabıǵatqa aram qolyn aralastyratyn qaskóılerge qoryqshylar endi qos katermen qarsy shyqpaq. Bul – óńirde ekojúıeni saqtaýdyń sapasyn arttyra túsetin bolady.

Mańǵystaý oblysy