Bas prokýratýra baspasóz qyzmetiniń málimetine sáıkes, qazirgi tańda quqyq qorǵaý organdaryna «Garant 24 Lombard», «ESTATE Lombard» JShS-ne jáne «Nýralı Kapıtal», «Vygodnyı zaım» mıkrokredıttik uıymdarynyń ıeleri azamattardyń jyljymaly jáne jyljymaıtyn múlikterin, aqshalaı qarajattaryn zańsyz ıemdenip alý áreketterine qatysty aryzdar túsýde.
Atalǵan uıymdarmen 42 myń kelisim-shartqa otyrǵan 6 myńnan asa azamat júgingen. Polısııa organdary olardyń ótinishteri negizinde 22 qylmystyq is boıynsha sotqa deıingi tergep-tekserýdi bastady. Lombardtardyń 1 menedjeri men 12 fılıal dırektorlary jaýapkershilikke tartylýda.
Tergeýdiń obektıvtiligin qamtamasyz etý úshin prosessýaldyq prokýrorlar bekitilgen.
Alaıaqtar óz maqsattaryna jetý úshin túrli jarnamalardy belsendi túrde qoldanǵany, olardyń ishinde shoý-bıznes juldyzdary men tanymal blogerlerdi paıdalanǵany anyqtaldy.
Sotqa deıingi tergep-tekserý barysynda jarnama jasaýdy júzege asyrǵan jáne taratqan tulǵalardyń jaýapkershiligi qarastyrylyp, olardyń áreketterine quqyqtyq baǵa beriletin bolady.
