Taraptar Qazaqstan men IýNESKO arasyndaǵy mádenıetaralyq dıalogty damytý salasyndaǵy dáıekti yntymaqtastyqty talqylady. IýNESKO Bas dırektorynyń orynbasary óz kezeginde Elbasy Nursultan Nazarbaevtyń Álemdik jáne dástúrli dinder lıderleriniń sezi syndy alań qurý týraly bastamasynyń mańyzdylyǵyn atap ótti.
«Búgingi tańda elordamyzda alty dinaralyq forým ótti. Mınıstrlik, qazaqstandyq taraptyń negizgi uıymdastyrýshylarynyń biri retinde, 2021 jyldyń kúzinde ótetin kezekti sezge daıyndyq jumystaryn belsendi júrgizýde. Biz IýNESKO-nyń burynǵy basshylary Koıchı Masýýra men Irına Bokovanyń osy mańyzdy alańnyń jumysyna qatysýyn, sondaı-aq qazirgi Bas dırektor Odre Azýleniń túbegeıli qyzyǵýshylyǵyn joǵary baǵalaımyz», dedi Dáýren Abaev kezdesý barysynda.
Sondaı-aq kezdesýde «Jýsan» gýmanıtarlyq operasııasynyń nátıjeleri atap ótildi jáne barlyq kezeńderdiń nátıjeleri boıynsha Sırııadan 595 qazaqstandyq shyǵaryldy. Qazaqstandyq tájirıbe sheteldik áriptesterdiń joǵary qyzyǵýshylyǵyn týdyrdy.
Sonymen qatar Qazaqstannyń Aqparat jáne qoǵamdyq damý mınıstri elimizdiń Baılanys salasyn damytýdyń halyqaralyq baǵdarlamasyna qatysýyn jandandyrý máselesine qyzyǵýshylyq tanytty.
«Biz úshin jýrnalıstik bilim salasyndaǵy yntymaqtastyq ta mańyzdy. Bolashaqta IýNESKO-nyń ýnıversıtetter úshin jýrnalıstıka boıynsha jasaǵan tıptik oqý baǵdarlamasyn jáne jalǵan jańalyqtardyń taralýyna qarsy is-qımyl jónindegi nusqaýlyqty, mysaly, olardyń qazaq tiline aýdarylýyn jeńildetý arqyly Qazaqstanda keńirek qoldaný oryndy dep oılaımyn», dedi D.Abaev.
