Otyrys barysynda qoǵamdyq keńester qyzmeti jónindegi zań jobasy talqylandy. Is-sharaǵa qoǵamdyq keńester, úkimettik emes uıymdar, sarapshylar qaýymdastyǵynyń ókilderi, memlekettik organdar men halyqaralyq uıymdardyń basshylary qatysty.
Jıyndy ashqan N.Ábdirov qoǵamdyq keńesterdiń el damýyndaǵy mańyzyna toqtala kele, osy saladaǵy birqatar kemshilikti atap ótti. Depýtattyń aıtýynsha, qoǵamdyq keńester eshqandaı memlekettik mekemeniń quzyryna kirmeı, derbes jumys isteýi tıis.
«Qoǵamdyq keńester «janyndaǵy» bolmaýy tıis. Búginda aýmaqtyq barlyq qoǵamdyq keńester durys atalady. Olar – oblystyń, aýdannyń, Almaty, Nur-Sultan qalasynyń qoǵamdyq keńesteri», dedi N.Ábdirov.
Buǵan mysal retinde depýtat Densaýlyq saqtaý mınıstrliginiń qoǵamdyq keńesin mysalǵa keltirdi.
«Eger qoǵamdyq keńes ataýynda Densaýlyq saqtaý mınıstrligi kórsetilse, onda bul – durys emes. Ol mınıstrliktiń qoǵamdyq keńesi bola almaıdy. Atalǵan zań jobasymen jumys istegen bastapqy kezeńde-aq qoǵamdyq keńesterdiń qandaı da bir memlekettik organnyń, ákimdiktiń, mınıstrliktiń janyndaǵy bolmaýyna mán bergen edik. Uıym aýmaqtyń qoǵamdyq keńesi nemese qandaı da bir baǵyttyń qoǵamdyq keńesi bolýy tıis. Aıtalyq, Ishki ister mınıstrliginde IIM janyndaǵy qoǵamdyq keńes emes, ishki ister organdarynyń qyzmet máseleleri jónindegi qoǵamdyq keńes bolýy qajet», dep túsindirdi N.Ábdirov.
Budan keıin sóz alǵan Aqparat jáne qoǵamdyq damý vıse-mınıstri Danııar Esın «Qoǵamdyq keńester qyzmetiniń máseleleri boıynsha Qazaqstan Respýblıkasynyń keıbir zańnamalyq aktilerine ózgertýler men tolyqtyrýlar engizý týraly» zań jobasynyń negizgi erejelerin tanystyrdy.
«Qoǵamdyq keńester konsýltatıvtik-keńesshi organ sanalatyndyǵyn jáne óz qyzmetin táýelsiz ustanym negizinde júzege asyratynyn nazarǵa ala otyryp, qoǵamdyq keńesterdiń quramyn qurýdy jergilikti ókiletti atqarýshy organdarǵa, al qoǵamdyq keńesterdiń quramyn bekitýdi jergilikti organdarǵa berý usynyldy», dedi vıse-mınıstr.
D.Esınniń aıtýynsha, zań jobasyna sáıkes, máslıhat ákimdik usynǵan qatysýshylar quramyn qabyldaýǵa nemese qabyldamaýǵa quqyǵy bar.
«Zań jobasynda keńester qyzmetiniń keıbir aspektilerin qarjylandyrý týraly sheshim de usynylady. Qoǵamdyq keńes músheleri qoǵamdyq bastamamen qyzmet atqarady. Qoǵamdyq keńes qyzmetine tólem jasaý máselesi sheshilgen. Buǵan qosa, qazirgi ýaqytta qoldanystaǵy laýazymdar tizilimine qoǵamdyq keńes hatshysy laýazymyn engizý jumysy júrgizilip jatyr. Sondaı-aq keńse taýarlaryn satyp alýǵa, jergilikti deńgeıde qoǵamdyq baqylaý júrgizý úshin kásibı sarapshylar qyzmetine tólem jasaýǵa jáne óńir ishindegi issaparlar shyǵyndaryna qarajat qarastyrylǵan», dedi D.Esın.
Aıta ketý kerek, qazirgi tańda elimizde túrli deńgeıdegi 234 qoǵamdyq keńes jumys isteıdi. Sonyń 18-i – respýblıkalyq deńgeıde. Osy keńesterdegi múshelerdiń sany 3564 adamǵa jetken.
