Batys Qazaqstan oblysynda «Kóktem-2020» respýblıkalyq komandalyq oqý-jattyǵýy bastalǵanyn budan buryn habarlaǵan edik. Oqý-jattyǵý ssenarııi boıynsha oblystyń ár jerinde túrli sıpatta apattyq jaǵdaı «bolyp», tótenshelikter men jalpy azamattyq qorǵanys qyzmetiniń qutqarý-qalpyna keltirý is-qımyl sharalary pysyqtaldy.
Josparlanǵan «apat» aýqymy shynynda kólemdi edi. Máselen, ssenarıı boıynsha «Oral Jaıyqjylýqýat» mekemesinde bolǵan apattan qalaǵa jylý men jaryq berýde irkilis bolyp, 60240 adam jylýsyz qaldy.
Terekti aýdanynyń Podstepnoe aýyly tusynda, «Samara-Shymkent» tas jolynda «KamAZ» ben «Toıota Kamrı» soqtyǵysyp, kólik ishindegi jolaýshylardyń keıbiri qaza taýyp, keıbiri kólik ishinde qysylyp qaldy. Jedel-qutqarý jasaǵy kólikterden qaza bolǵan úsh adamdy, jaraqat alǵan eki adamdy shyǵaryp, jedel járdem dárigerlerine tapsyrdy.
«Deawoo» markaly mıkroavtobýs tehnıka aqaýynan jol jıegine toqtap, kúnniń sýyqtyǵynan qaıta tutana almady. Sóıtip, О́zbekstan Respýblıkasynyń 15 azamaty sýyq avtobýsta qalýǵa májbúr boldy.
Oral qalasynyń irgesindegi 1 jáne 2-saıajaı aýdanyndaǵy turǵyn úılerdi sý basty. Saıajaılarda turatyn halyqty habardar etý jáne evakýasııalaý uıymdastyryldy.
«Qyrsyqqanda qymyran irıdi» degendeı, qalanyń las sýyn dalaǵa shyǵaratyn «Batys Sý Arnasy» mekemesinde de kútpegen aqaý shyqty. Káriz sýy kóshege quıylyp, ekologııalyq apat bolýǵa aınaldy.
Buǵan qosa tolassyz jaýǵan jaýyn-shashynnan muzy áli kete qoımaǵan ózender deńgeıi kúrt kóterilip, alapat tasqyn jolyndaǵynyń bárin jaıpap kele jatty. Iri sý qoımalary tasyp, joldar buzylyp, turǵyndardyń ómiri men densaýlyǵyna qaýip tóndi. Sýǵa ketken kólikter de bar.
«Jaman aıtpaı jaqsy joq» degen ǵoı. Sondyqtan yqtımal apatqa daıyn bolý kerek-aq. Abyroı bolǵanda oqý-jattyǵý sharalaryna qatysqan barlyq arnaıy qyzmet ókilderi – izdestirý-qutqarý bólimshesi, jedel-qutqarý jasaǵy, «Apattar medısınasy ortalyǵy» fılıaly, jedel járdem brıgadasy, jergilikti polısııa qyzmeti bir jaǵadan bas, bir jeńnen qol shyǵara qımyldady. Sóıtip, barlyq tótenshe jaǵdaı joıyldy, zardap shekkender qutqaryldy, olarǵa alǵashqy medısınalyq jáne psıhologııalyq kómek kórsetildi.
«Kóktem-2020» respýblıkalyq komandalyq-shtabtyq oqý-jattyǵýynyń eki kúndik qorytyndysy boıynsha barlyq alǵa qoıylǵan mindet oryndaldy, oqý-jattyǵý maqsatyna jetti» dep habarlaıdy Batys Qazaqstan oblystyq Tótenshe jaǵdaılar departamentiniń baspasóz qyzmeti.
Batys Qazaqstan
