Atalǵan keńes negizinen halyqty birlikke, tatýlyqqa úndeıdi ári halqymyzdyń ejelden qalyptasqan qarapaıym adamgershilik qaǵıdalaryn nasıhattaıdy. Keńes quramynda aýyldyq okýrgterdiń ardagerleri, analar men jastar, mesenattar men meshit ımamdary, sondaı-aq úkimettik emes uıymdardyń jáne etnomádenı birlestikterdiń ókilderi de bar. Osy ýaqytqa deıin Aýqatty jáne Sortóbe aýyldarynda 3 kezdesý uıymdastyrylyp, oǵan 400-ge jýyq adam qatysqan. Sonymen qatar aýdandaǵy árbir aýyldyq okrýgte áıelder men jastardyń qoǵamdyq keńesi qurylýda.
Búginde kópshilikti beıbitshilik pen tatýlyqqa úndeý mańyzdy. Osy oraıda ulttyq qundylyqtardy dáripteý maqsatynda Jambyl oblystyq mádenıet, arhıvter jáne qujattama basqarmasynyń uıymdastyrýymen Qarakemer, Aýqatty, Qarasý, Masanchı jáne Bular batyr aýyldarynda ál-Farabıdiń 1150 jyldyǵyna arnalǵan ádebı postýlat, túrli anımasııalyq jáne kórkem fılmder kórsetilimi ótti. Munda Sh.Ýálıhanov atyndaǵy ámbebap-ǵylymı kitaphanasy kópshilik nazaryna kemeńger oıshyl týraly mańyzdy málimetter usyndy. Sondaı-aq, kórsetilgen fılmderde tatýlyq, birlik pen beıbitshilik syndy qundylyqtar kórinis tapqan.
Sol sııaqty Qordaı aýdanynyń birqatar aýyldarynda Jambyl oblystyq bilim basqarmasynyń uıymdastyrýymen de túrli sharalar ótýde. Mundaǵy maqsat – jas urpaqty bilimdilikke, parasattylyqqa tárbıeleý. Aýyldarda rýhanı-mádenı sharalar naýryz aıynyń sońyna deıin jalǵasady. Onyń ishinde «Men elimniń ulanymyn!» atty 5-10 synyp oqýshylary arasynda shyǵarma jazý baıqaýy, jergilikti jerlerdegi etnos birlestikterimen birlesken «Ult ulysqa ortaq úı – Qazaqstan» atty festıval, «Ustazyma alǵys!» alǵys aıtý aksııasy, «Armysyń, áz Naýryz!» salt-dástúrler keshi sııaqty sharalar bar. Sonymen qatar túrli sharalar aıasynda kópbalaly otbasylarǵa kómek kórsetiletin bolady.
Jambyl oblysy
