19:26
Ulybrıtanııada koronavırýs juqtyrǵandar sany 51-ge jetti
Densaýlyq saqtaý mınıstri Mett Henkok Ulybrıtanııada indet juqtyrǵandar sany 51-ge jetkenin málimdedi.
Sonymen qatar, ol Ulybrıtanııa úkimeti men eldiń ulttyq densaýlyq saqtaý qyzmeti daǵdarysqa qarsy áreket etýge daıyn ekenin jetkizdi.
________________________________________________________________________________________
18:40
Iranda 23 depýtat vırýs juqtyrǵan
Iranda indetten kóz jumǵandar sany 77-ge jetti.
Eldiń densaýlyq saqtaý organdary 2336 adam koronavırýs juqtyrǵanyn málimdedi.
Densaýlyq saqtaý mınıstriniń orynbasary Alıreza Raısı memlekettik BAQ-qa sońǵy táýlikte 835 naýqas anyqtalǵanyn jáne 11 adam qaıtys bolǵanyn habarlaǵan.
Iran Qytaıdan keıin vırýstan kóz jumǵandar sany eń kóp el.
Keıbir málimet boıynsha Iranda koronavırýstan qaza bolǵandardyń sany áldeqaıda kóp.
_________________________________________________________________________________________
18:15
Fransııada 100-den astam mektep jabyldy
Fransııa bıligi vırýs kóp taraǵan aımaqtarda ornalasqan 120-dan astam mektepti jaýyp tastady.
Ázirge eldiń soltústik bóliginde ornalasqan Ýaza aımaǵyndaǵy bastaýysh jáne orta mektepter jumysyn toqtatqan, qashan qaıta ashylatyny belgisiz.
Jalpy elde 191 adam indetke shaldyqqan jáne 3 adam ólimi tirkeldi.
Bilim mınıstri Jan-Mıshel Blanke eldegi barlyq oqý oryndaryn jabý týraly sheshim qabyldanbaǵanyn aıtty.
Bılik qazirdiń ózinde shetelge barýdy josparlaǵan synyptyq saparlardy toqtatty.
_____________________________________________________________________________________________
16:35
Koronavırýs Ýkraınaǵa jetti
Ýkraınada vırýs juqtyrǵan alǵashqy naýqas tirkeldi.
Densaýlyq saqtaý mınıstrligi Qoǵamdyq densaýlyq ortalyǵynyń ókili Igor Kýzın jeksenbi kúni Chernovsy qalasynda er adam indet juqtyrdy degen qaýippen aýrýhanaǵa jetkizilgenin habarlady. Naýqastyń qazirgi jaǵdaıy turaqty.
Indetti juqtyrǵan azamat elge Rýmynııadan avtokólikpen kelgen, al oǵan deıin onyń Italııada bolǵany anyqtaldy.
Qazir ýkraın bıligi Býharestpen baılanysyp, Rýmynııaǵa ushqan reıs jolaýshylaryn tekserýdi usynyp jatyr.
Naýqas áıelimen birge saıahattaǵan, ol qazir karantınde. Shekaradan ótken kezde ekeýiniń de temperatýrasy qalypty bolǵany aıtyldy.
_____________________________________________________________________________________________
16:00
Olımpıada jyl sońyna shegerilýi múmkin
Japonııanyń Halyqaralyq Olımpıada komıtetimen jasalǵan kelisimsharty oıyndy jyl sońyna deıin ótkizýge múmkindik beredi.
«Kelisimshart boıynsha oıyn 2020 jyly ótkizilýi tıis, naqy ýaqyty kórsetilmegen. Iаǵnı, bul Olımpııa oıyndaryn keıinge shegerýge kedergi bolmaıdy degendi bilidredi»,- dedi Seıko Hasımoto.
Oıyn bıylǵy jyldyń shilde aıynda Tokıo qalasynda josparlanǵan.
_____________________________________________________________________________________________
15:52
Malaızııada taǵy 7 adam vırýs juqtyrdy
Malaızııa densaýlyq mınıstrliginiń habarlaýynsha, elde vırýs juqtyrǵan taǵy 7 adam tirkeldi. Qazir naýqastardyń jalpy sany 36-ǵa jetti.
_____________________________________________________________________________________________
15:16
Taǵy bir qytaı dárigeri vırýstan kóz jumdy
The Global Times Qytaıdyń memlekettik basylymynyń málimetinshe, koronavırýstan taǵy bir qytaı dárigeri qaza boldy.
Dáriger Meı Chjýnmın osyǵan deıin koronavırýs týraly eskertpek bolǵan Ýhanda kóz jumǵan dárigerdiń áriptesi eken.
___________________________________________________________________________________________
12:35
Marokkoda alǵashqy jaǵdaı tirkeldi
Marokko Densaýlyq saqtaý mınıstrligi keshe keshke elde koronavırýs juqtyrǵan alǵashqy naýqasty anyqtady.
Indetti juqtyrǵan marokkandyq azamat Italııada turady, qazir ol Kasablankadaǵy aýrýhanada emdelip jatyr.
_____________________________________________________________________________________________
12:07
Gonkong turǵyndaryn Ýhannan evakýasııalaıdy
Gonkong bıligi el turǵyndaryn indetttiń oshaǵy bolǵan Qytaıdyń Ýhan qalasynan evakýasııalaý týraly sheshim qabyldady.
533 adamdy elge qaıtarý úshin tórt charterlik reıs jaldanǵan. Gonkong turǵyndary sársenbi jáne beısenbi kúnderi elge jetkizilip, 14 kún karantınde bolady.
______________________________________________________________________________________________
11:00
Ońtústik Koreıa vırýsqa «soǵys» ashty
Seısenbi kúni Ońtústik Koreıada koronavırýspen aýyrǵandar sany 4800 adamnan asty. Infeksııa eldiń ońtústik-shyǵysynda ornalasqan Degý qalasynda órship tur.
Tek dúısenbiniń ózinde 600 jaǵdaı tirkelgen, nátıjesinde naýqastar sany 4812-ge jetken. Bul týraly Indetti baqylaý jáne aldyn alý boıynsha koreı ortalyqtary (KCDC) habarlady.
Osy ýaqytqa deıin Qytaıda taralǵan koronavırýstyń jańa túrinen 28 adam qaıtys boldy.
Elde tirkelgen naýqastardyń 60%-ǵa jýyǵy 2,5 mıllıon halqy bar Degýde ornalasqan Sınchhondzı dinı sektasynyń fılıalymen baılanysty.
Prezıdent Mýn mınıstrler kabınetimen ótkizgen kezdesýde Degý men Kıonsan provınsııasyndaǵy jaǵdaı shegine jetkenin aıtyp, koreı eli vırýsqa «soǵys» ashatynyn habarlady. Kezdesýdiń barlyq qatysýshylary maskamen keldi.
______________________________________________________________________________________________
09:20
Álemdegi jaǵdaı qandaı?
Indet álem boıynsha 70-ke jýyq elge tarap úlgergen. 90 myńnan astam adam juqtyrdy degen derek bar. Naýqastardyń kópshiligi Qytaıda bolǵanymen, koronavırýs sońǵy aptada basqa elderde de keńinen tarap jatyr.
Qytaıdy eseptemegende, álem elderinde 8800 adam vırýs juqtyrǵan. Naýqastar sany kóp tirkelgen elder qatarynda Iran, Ońtústik Koreıa, Italııa jáne Japonııa bar.
Keshe Italııada vırýstan kóz jumǵandar sany 18-den 52-ge kóterilse, juqtyrǵandar sany 1835-ke jetken.
Iran da taǵy 12 adamnyń ólimin tirkedi. Qazir elde jalpy 66 adam koronavırýstan kóz jumdy. Qaza bolǵandar qatarynda el bıliginde jaýapty qyzmet atqarǵan saıasatker de bar.
Ulybrıtanııada vırýs juqtyrǵandar sany - 39.
