Qos azamat mádenı ortalyqty salýǵa uzyn-yrǵasy 40 mıllıonǵa jýyq qarajat jumsaǵan. El ıgiligine aınalatyn sáýletti saraı az ǵana ýaqyttyń ishinde boı kóteripti. Jaqsy istiń janynda aýyl ákimdiginiń bas mamany Erqanat Taýshıev te júripti. Aýylda bastalǵan qurylysqa qol ushyn bergen azamattar az emes. Turǵyndar da qarap otyrmaǵan. Judyryqtaı jumylǵan, birlik tanytqan. Endi mine, adamı ádemi isterdiń uıytqysy bolatyn eńseli ǵımarattyń esigi aıqara ashylyp, alystan ózine tartyp, menmundalap tur.
Mádenıet aýylynan jaqsy men jaısańnyń kóp shyqqandyǵyn aıta ketken lázim. Olardyń arasynda Sosıalıstik Eńbek Erleri, ǵylym doktorlary, generaldar bar. Tektilerdiń tabany tıgen topyraqta búgingi kúni ótkenniń ómirsheń ónegesi búr jaryp tur. Búgingi mádenıet oshaǵy kópshiliktiń jaı ǵana bátýaly sharaǵa bas qosatyn jeri emes, jalpaq jurttyń ǵasyrlar qoınaýynda qalǵyp ketken mol murasy qaptalyp, rýhanı jańǵyrýdyń baǵa jetpes altyn bastaýyna aınalatyn orny.
Ortalyqtyń ashylý saltanatynda jasy júzge jýyqtap qalǵan aýyl aqsaqaly Dýlat Ábdirashuly bata berdi. Oblys ákiminiń orynbasary Ǵalymjan Ábdihalyqov pen «Aqtilek» mádenı ortalyǵynyń ashylýyna súbeli úles qosqan Mútállap Jumanbaev aq tilekterin jetkizdi. Oqý ozaty Dámir Qarabaı úlkendermen birge dástúrli lentany qııýǵa qatysty. Qýanyshtyń belgisindeı shashý shashyldy.
70 oryndyq kishi, 220 oryndyq úlken zaly bar mádenı ortalyq qajetti qural-jabdyqtarmen tolyq qamtamasyz etilgen. Endigi arada 650-ge jýyq turǵyny bar aýyl ózderiniń barlyq salmaqty sharasyn osy jerde ótkizetin bolady. Týǵan topyraǵyn kórkeıtsem degen izgi nıettiń aıǵaǵyndaı qos kásipkerdiń arqasynda boı kótergen jańa ortalyqtyń ádemi mysaly ózgege ónege bolsa, qanekeı?!
Aqmola oblysy,
Býrabaı aýdany.
