Baspasóz májilisine Sybaılas jemqorlyqqa qarsy is-qımyl agenttiginiń oblystyq departamenti basshysynyń orynbasary Serik Qanybekov, aqparattyq-aǵartýshylyq shtabtyń jetekshisi Aısulý Dýtbaeva, shtab músheleri Zareta Fatalıeva, Álııa Teleýǵalı qatysyp, shtabtyń maqsat-mindetterin baıandady.
– Atalǵan shtab bizdiń oblysta da jaqsy jumystar júrgizip jatyr. Sybaılas jemqorlyqqa qarsy is-qımyl agenttigi janynan birneshe ınstıtýttar qurylǵan. Biraq biz agenttik moınyndaǵy júkti, ıaǵnı jaýapkershilikti aqparattyq-aǵartýshylyq shtabyna, Arnaıy monıtorıngtik topqa nemese «Adaldyq alańy» keńsesine júktemeımiz. Qazir quqyqqorǵaý organdarynyń ishinde qoǵammen tyǵyz baılanysta júrgen osy Sybaılas jemqorlyqqa qarsy is-qımyl agenttigi dep aıta alamyz. Biz óz júgimizdi ózimiz kóteremiz. Qylmysty qýdalaý sharalaryna qatystyrmaımyz. Ol mindetterdi ózimiz oryndaımyz. Bul jerdegi maqsat – qoǵam men quqyqqorǵaý organy baılanysyn ornatý, sybaılas jemqorlyqqa qarsy mádenıetti qalyptastyrý. Postkeńestik elder arasynda alǵash bolyp 1995 jyly Qazaqstanda sybaılas jemqorlyq týraly zań qabyldandy. Sol zań 2015 jyly jańaryp, «Sybaılas jemqorlyqqa qarsy mádenıet» degen norma engizildi. Mádenıettiń ártúrin bilesizder. Biraq osy sybaılas jemqorlyqqa qarsy mádenıetti qalaı qalyptastyramyz? Parasattylyq uǵymy degen ne? Osy suraqtarǵa qoǵammen birlese jaýap izdeý maqsatynda osyndaı ınstıtýttar quryldy. Agenttik janyndaǵy bul ınstıtýttardyń jumystary bir-birin qaıtalamaıdy. Monıtorıng degen – qoǵam men qorshaǵan ortada bolyp jatqan qubylystar men áreketterge syrttaı baqylaý júrgizý. Arnaıy monıtorıngtik toptyń ózi belgili bir mekemege baryp qandaı da bir qujattardy talap ete almaıdy. О́ıtkeni ol tekserý jumysyna aınalady. Toptyń mindeti – tekserý emes, baqylaý júrgizý. Ol qalaı júrgiziledi? Baqylaý naqty bir mekemede bolyp jatqan olqylyqtar men kemshilikterdi aıtyp, qoǵamnyń nazaryn aýdarý, memlekettik bılik ınstıtýttaryna oryn alǵan máselelerdi kóterý. Qazirdiń ózinde Antıkor ortalyǵy azamattardy qabyldaıtyn orynǵa aınaldy. Kún saıyn qanshama azamattar keledi, kóptegen mańyzdy máseleler talqylanady. Aqparattyq-aǵartýshylyq shtaby úshin osy ortalyqta qaı kezde bolsa da jumys isteýge tolyq múmkindik bar. Qysqa merzimniń ishinde shtab quramyna elimizge janashyr azamattardy jınaldy. Qoǵam ıgiligi úshin osy jumystardy birlese júrgizýge qýanyshtymyz, dedi S.Qanybekov.
Departament basshysy orynbasarynyń aıtýynsha, álemde ár memlekettiń sybaılas jemqorlyq deńgeıin, ıaǵnı ındeksin esepteıtin Transparency International degen halyqaralyq uıym bar ekenin, sol arqyly álem elderiniń jemqorlyq deńgeıi anyqtalatynyn málimdedi. Onyń aıtýynsha, halyqaralyq uıym álemdegi 13 taldaý agenttiginiń aqparattaryna súıene otyryp taldaý jasaıdy. Sonyń 9-y bizdiń elimizde jumys isteıdi eken. «Halyqaralyq uıym osy agenttikterden jyl saıyn aqparat jınaıdy.
О́tken jyly áleýmettik jáne bıznes bloktar arasynda júrgizgen zertteýleriniń qorytyndysy boıynsha Qazaqstan sybaılas jemqorlyq ındeksinde 124-ten 113-ke kóterilip, 11 satyǵa joǵarylaǵan. Al bul kórsetkishke osyndaı qoǵamdyq ınstıtýttardyń qurylýynyń jáne halyqtyń, qoǵamnyń sybaılas jemqorlyqqa qarsy kúreske atsalysýy arqasynda qol jetip otyr. Mine, taldaý agenttigi osyny esepke alady. Máselen, «Adaldyq alańy» ınstıtýty neden paıda boldy? Bul eń alǵashynda 2018 jyly 5 qazanda Elbasynyń Joldaýynda aıtyldy. Nur-Sultan qalasyndaǵy oń tájirıbe baıqaldy, joba jemisti bolyp, búkil respýblıkada jumys isteýge kóshti. Arnaıy monıtorıngtik toptar da dál solaı. Aqparattyq-aǵartýshylyq shtaby da tap osy jolmen qurylyp otyr. Osyndaı jobalardyń arqasynda Qazaqstan sybaılas jemqorlyq ındeksin neǵurlym tómendetkeni durys. О́ıtkeni halyqaralyq ınvestorlar men bıznes qaýymdastyq bir memleketke baryp ınvestısııa quıyp, bıznesin qurý úshin joǵary atap ótken halyqaralyq taldaý agenttiginiń málimetterin nazarǵa alady eken. Sol sebepti, meniń oıymsha, aqparattyq-aǵartýshylyq shtabtyń jumysy ólsheýsiz, dedi ol.
Brıfıng barysynda shtab músheleri óz oılaryn ortaǵa salyp, jańa qurylymnyń jumys josparymen tanystyrdy.
Sybaılas jemqorlyqqa qarsy is-qımyl agenttigi qyzmetiniń qoǵamda belsendi júrgizilýine qoldaý kórsetý maqsatynda qurylǵan Mańǵystaý oblysy boıynsha aqparattyq-aǵartýshylyq shtab óz jumysyn belsendi júrgizbek.
Mańǵystaý oblysy
