Segiz ul men jeti qyzdyń eń úlkeni 18 jastaǵy Inna. «Aldyńǵy arba qaıda júrse, sońǵysy sonda júredi» degen emes pe, mýzykaǵa qabileti bar Innanyń jolyn artyndaǵy úsh sińlisi de jalǵastyrýda eken. Innanyń ózi fortepıanoda oınasa, Lena fleıtada, Ira men Tanıa skrıpkada oınaıtyn kórinedi. Al ul balalar orystyń halyq aspaby - balalaıka men akkkordeonda jaqsy tartady eken, sóıtip, otbasylyq ansambl de quryp alypty.
Temirǵalı Tekebasuly bastaǵan «aýyldyqtar» toby osy otbasyn kóktem merekesimen quttyqtap, týǵan Otandaryna adal qyzmet etip, kórgendi azamat bolýlaryn tiledi jáne aparǵan baǵaly syılyqtaryn tapsyrdy.
«Qazaqstan Respýblıkasynyń barlyq azamaty teń quqyqty, memleket bárine birdeı qamqorlyqtar jasaýda. Erteń-aq sender de Otanymyzdyń bilikti de bilimdi azamaty bolasyzdar. Sol kúnge aman jetińizder!» dedi ol balalarǵa.
Kelgender balalardyń bári jaqsy tárbıe alyp kele jatqandyǵynyń kýási boldy. Bári de oqýǵa yntaly, adamgershilikteri de jaqsy, tártipti balalar ekeni kórinip tur. Kezbelik, qańǵybastyq degen bul úıdiń balalaryna jat qylyq eken. Bári de kelgen qonaqtarǵa qurmet kórsetip, suraǵan saýaldarǵa yjdahatpen jaýap berip jatty.
Balalardyń anasy Tatıana Kýltysheva kishkentaılardy oınatý, tamaqtandyrý, kıindirý jumystaryna úlkenderdiń kóp kómek beretinin aıtty.
«Úlken balalarym kómektespese bárine úlgerý qıyn. Qyzdarymnyń aldy úı jınaý, tamaq pisirý, kir jýý jumystaryna da kómektesedi. Tipti, is tigý sııaqty jumystardy da solar atqarady» dedi ol.
Pavel Kýltyshevtiń ózi on qolynan óner tamǵan sheber kórinedi. Ol avtomobıl jóndeý, dánekerleý jumystaryn jeńil atqara beretin kórinedi. Qazirgi turyp jatqan úılerin de óz qolymen keńeıtip alǵan eken. Úlken uldar bul iste ákeleriniń senimdi kómekshisi bola bilgen.
Qazir Kýltyshevterge qaltaly azamattar úlkendeý mıkroavtobýs ta alyp beripti. Alaıda bul otbasy bireýden birdeńe surap, talap etip, qol jaıatyn adamdar emes. Bárin de óz múmkindikterimen jasaǵysy keletin kórinedi.
Soltústik Qazaqstan oblysy
