Baıyrǵy babalardyń azattyq úshin kúresi HHI ǵasyrdyń kún tártibindegi kez kelgen ózekti máselemen qosyla óriletinin qaıtersiz. Tarıhtyń da aıtylatyn jeri bar. Ýaqyty bar, jóni bar. Al biz kóz ilespes kezeńde ýaqyttyń tegershigin toqtatyp qoıyp, ǵasyrlar boıy kúresken táýelsizdigimizdiń quny qanshalyqty qymbat ekendigin aıtyp, qadir-qasıetiniń ulylyǵyn tereńnen qozǵaımyz. Aqyrynda, áńgimeniń aıaǵy táýelsizdik tuǵyrynyń berik bolýy eldiń tatýlyǵy men birligi týraly tujyrymǵa baryp bir-aq tireledi...
«Men – qazaqpyn. О́z halqymdy maqtan tutamyn. Maǵan onyń qym-qýyt tarıhy, odan da góri búgingi kúni qymbat» degen edi qaısar aqyn Juban Moldaǵalıev Jeltoqsan kóterilisine qatysty Jazýshylar odaǵynda sóılegen sózinde. Tarıh kóshine kóz jiberip, burynǵy babalarymyzdyń dańqy men erlikke toly isterine maldaný búgingi tirligimizdiń túzelýine qanshalyqty áser etedi? Bos maqtan bolyp shyqpaı ma? Qaıta onyń ornyna órkenıetti qoǵam qurý jolyndaǵy naqty qam-qareketimiz bolashaqqa bastaý bolmaı ma? Juban aqyn «búgingi kúni qymbat» degende osyny aıtqan bolar. О́ıtkeni azamattarynyń quqyǵyn basty qundylyq sanaıtyn aldyńǵy qatarly elderge qarap boı túzeýimiz memlekettiligimizdiń de mártebesin asqaqtata tússe kerek-ti.
«Ornyn taýyp ala almaı turyp, sol orynǵa ábden jaıǵasyp úlgermeı turyp, keýde qaǵý – erjetetin emes, ker ketetin qaýymnyń isi. О́ıtkeni keshegi otarshyldyq – bireýdiń aldynda ǵana táýeldi bolyp, qalǵan dúnıemen sol arqyly jalǵasý. Al búgingi táýelsizdik – bireýdiń emes, kúlli dúnıeniń ahýalyna táýeldi bolý; sol táýeldiligińdi eskere otyryp kúlli dúnıemen birge árekettesip, birge yqpaldasa bilý» degen edi abyz Ábish Kekilbaıuly. Sóz uǵar janǵa qazirgi qam-qareketimizdiń basty kredosy ispetti osy tujyrym.
«Kúlli dúnıeniń ahýalyna táýeldi bolǵan» tusta, tórtkúl dúnıedegi qarym-qatynas ǵaryshtyq jyldamdyqpen ózgeriske ushyrap jatqanda jaıbaraqat bolý degenińiz áý basta tarıh sahnasyna kelgendegi nesibeńnen qur qalý degen sóz. Basqalaı aıtqanda, «Dúnıege bir sábı kelse, bir túp jýsan artyq shyǵady» degen qanatty sózdi qazirgi zamannyń qarym-qatynas qaǵıdasyna qıystyrý qıyn. Básekelestiktiń dáýreni beleń alǵan ýaqytta kiriptarlyq qaqpanyna túsip qalmas úshin eldiktiń máselesin «kúlli dúnıemen birge árekettesip, birge yqpaldasa», jantalasa júrip sheshýge týra keledi. Oǵan qosa halyq turmysynyń jaqsarýy da basty másele. Babalar ǵasyrlar boıy armandaǵan, sol úshin kúresken táýelsizdik sonda ǵana tolyqqandy bolady.
Táýelsizdik jarııalaýmen is bitpeıtini, á degennen halyqtyń dáýleti tasyp, toǵyzynshy terrıtorııada «qoı ústinde boztorǵaı jumyrtqalaǵan zaman» ornamaıtyny belgili ǵoı. Dese de, memlekettiń áleýeti men halyqtyń dáýletin tarazyǵa tartatyn bolsaq, áli de bılik tarapynan atqarylatyn sharýanyń shash-etekten ekenin kóremiz. Osy tusta Prezıdent Qasym-Jomart Toqaev aıtqan «Halyq únine qulaq asatyn memleket» tujyrymdamasynyń máni zor ekendigin aıtýymyzǵa týra keledi. Gáp osy tujyrymdamanyń naqty is júzine asýynda ǵana. «Halyq únine qulaq asatyn memleket» demekshi, halyq únine qulaq asý kez kelgen ujymnan bastaý alýy kerek. Iаǵnı mekeme basshysy quzyryndaǵylardyń talap-tilegine qulaq túrip, ujymda jaqsy ahýal ornyqtyrý arqyly sol salanyń órkendeýine, jetistikke jetýine septigin tıgizedi. Halyq degenińiz túrli salada eńbek etip júrgen qyzmetshiler emes pe? Árbir ujym músheleriniń muń-muqtajyn, áleýmettik máselesin sheshý negizinde memlekettegi ózekti máselelerdiń de túıini tarqatylady.
Toqsan sózdiń tobyqtaı túıinin ult kósemi Álıhan Bókeıhannyń «Bizdiń jurt bostandyq, teńdik, qurdastyq, saıası isin uǵynbasa, tezek terip, tarıh jolynda artta qalady. Baqyt, mahabbattan tysqary bolady. Bul ekeýi joq jurtqa tirshilik nege kerek?!» degen sózimen túıindegimiz keledi. Olaı bolsa, eıforııadan góri pragmatızmge basymdyq berý memlekettiń órkenıetti qoǵam qalyptastyrýyna yqpal etetini sózsiz!
