Aldyn-ala júrgizilgen boljamdarǵa sáıkes aımaqta 125 eldimekendi sý basý qaýpi bar kórinedi. Olardyń 45-i iri ózen-kólderdiń jaǵalaýynda ornalasqan.
– Kóktemgi sý tasqynynyń aldyn-alý bir kúndik másele emes. Sondyqtan bul jumystar birneshe jyl qatarynan jáne úzdiksiz júrgizilip keledi. Sınoptıkter naýryz aıynyń sońǵy aptasynda kúrt jylynatynyn boljap otyr. Osyǵan oraı, muz jarý jumystary 10 naýryzda bastalǵan. Sonymen qatar ózen arnalaryn tazartý, ótkelderdi qorshaý qolǵa alynǵan. Ásirese Esil, Shaǵalaly, Jabaı, Qalqutan, Sileti ózenderiniń qazirgi jaǵdaıy syn kótermeıdi. Eldimekenderdegi ylǵal kólemi jyldyq mólsherlemeden birneshe ese asyp jyǵylady. Sý tasý qaýpine oraı aımaqta 97 baqylaý beketi qurylǵan, – deıdi oblystyq tótenshe jaǵdaılar jónindegi departamentiniń bastyǵy Alekseı Sovetov.
Tótenshe jaǵdaılardyń aldyn-alý maqsatynda aımaqta 225,6 tonna janar-jaǵarmaı, 24 myń tonna ınertti materıal jáne 85 myńǵa jýyq qapshyq ázirlengen. Budan bólek 60 júzý quraly men 229 sý sorýǵa arnalǵan tehnıka daıyn. Eldi mekenderden 1 mıllıon 103 myń tekshe metrden astam qar shyǵarylǵan. 27 shaqyrym sý arnasy tazartylyp, retke keltirilse, 16 shaqyrym bóget jóndelip, irgesi nyǵaıtyldy. Kún kúrt jylynatyn bolsa, qaýip-qater eselene túspek.
– Aımaqtaǵy ylǵal kólemi 2017 jyly oryn alǵan sý tasqyny kezindegi mólsherden bir jarym, eki ese kóp. Sandyqtaý, Selınograd, Qorǵaljyn jáne Astrahan aýdandarynda qar qalyń. Kóp jylǵy baqylaýlarǵa sáıkes jaıylma ózen-sýlardaǵy muzdyń qozǵalýy naýryz aıynyń úshinshi onkúndigine dóp keledi. Qazir Atbasar men Sandyqtaý aýdandarynda sý tasqynynyń qaýpi óte joǵary. Buǵan ylǵal qorynyń qalypty shamadan tys, ıaǵnı, 2 ese joǵary bolýy sebep bolyp tur, – deıdi «Qazgıdromet» respýblıkalyq kásiporny oblystyq fılıalynyń bólim jetekshisi Nadejda Gorıshkına.
Apat aıtyp kelmeıdi. Áıtse de, óńirde 3 myńǵa jýyq qutqarýshy, 1 myńnan astam tehnıka ázir tur. Degenmen, tabıǵattyń tosyn minezine tosqaýyl bolý qıyn.
Aqmola oblysy
