Hákim Abaıdyń 175 jáne Uly Jeńistiń 75 jyldyǵyna arnalǵan merekelik konsertke bilim oshaǵynyń oqýshylary men ustazdary birneshe aı boıy daıyndaldy. Osynaý mádenı shara shymyldyǵy Qunanbaı aýylynyń kórinisi arqyly ashyldy. Danyshpan Abaıdyń «Jelsiz túnde jaryq aı» jáne «Kózimniń qarasy» ánderi kelinder hory men jetinshi synyp oqýshysy Mádına Seıfýllınanyń oryndaýynda ádemi de áserli shyqty.
– Bizdiń oqýshylar men ustazdar qaýymy qandaı da bolsyn án merekesine belsene qatysady. Repertýarymyz ár baıqaýǵa laıyqtalyp jasalady. Baıqaýǵa tyńǵylyqty daıyndaldyq, – deıdi №7 mektep-lıseıi dırektorynyń orynbasary Azamat Járkeev.
Baıqaýdyń ekinshi bóliminde áskerı-patrıottyq ánder oryndaldy. Joǵary synyp oqýshylary Dına Qasymova, Aısulý Qaısynova men muǵalimder hory kórermender qoshemetine bólendi.
