Sharaǵa jaýapty áskerı qurylym – Ulttyq ulan 5 mamyrǵa deıin estafetany aıaqtaýy tıis. Jeńistiń 75 jyldyǵyna arnalǵan taǵylymdy sharanyń basty maqsaty - tarıhqa taǵzym etý, ótken ǵasyrdyń bel ortasynda búkil adamzat balasynyń basyna qara bult bolyp úıirilgen fashızmge qarsy qandy soǵysta erlik kórsetken maıdangerlerdiń erligin óskeleń urpaqqa ónege etý.
Ishki ister mınıstrliginiń bastamasymen bıyl 5 aqpanda «Biz – Jeńistiń muragerimiz» degen uranmen bastalǵan estafetany qarsy alý sharasy búgin Qostanaıdaǵy Jeńis saıabaǵynda ótti. Jıynda Qostanaıdaǵy Ulttyq ulan sarbazdary Aqtóbe qalasynan jetken Jaýyngerlik týdy saltanatty túrde qabyldap aldy.
- Jeńistiń mereıtoıyna baılanysty respýblıka kóleminde 600-den astam sharalar uıymdastyrý josparlanǵan. Al bul estafeta elimiz boıynsha 11 myń shaqyrymdy júrip ótip, 40-tan astam áskerı bólimde aıaldamaq. Qostanaıda biz jeke qurammen birge tárbıelik saǵattar men taǵylymdy keshter uıymdastyryp, kózi tiri ardagerlermen kezdesý ótkizemiz. Sondaı-aq, qart maıdangerlerdiń úılerine baryp quttyqtap shyqqymyz keledi. Mektep qabyrǵalarynda patrıottyq dárister ótkizbekpiz, - dedi Ulttyq ulannyń «Ortalyq» óńirlik qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Qanat Belıakov.
Panfılovshylar týynyń kóshirmesi Qostanaıda eki kún bolyp, Kókshetaýǵa qaraı jol tartady.
Qostanaı
