Sýretter «Ulan» gazetinen alyndy
Balalar men jasóspirimderge arnalǵan gazet 1930 jyly 14 naýryzda «Jas Alash» gazetiniń 5-6 betterinde gazet ishindegi gazet bolyp alǵash jaryq kórdi. Ol kezdegi basylym ataýy «Pıoner» boldy. Al sol jyldyń qarashasynda «Pıoner» derbes basylymǵa aınaldy.
Basylym ár jas oqyrmanyn sóz álemine baýlyp, olarǵa shyǵarmashyl ári rýhanı orta qalyptastyra bildi.
Gazettiń qurylýyna jazýshylar men qoǵam qaıratkerleri S. Seıfýllın, B. Maılın, I. Jansúgirov, Ǵ. Músirepov, S. Esova, M. Áýezov, S. Muqanov, S. Begalın, B. Soqpaqbaev atsalysty.
Keıinnen gazet aty «Oktıabr balalary», «Qazaqstan pıoneri» dep ózgertildi.
Aıta ketetini, «Qazaqstan pıoneri» bolǵan tusta gazetke 50 jyldyq mereıtoıynda jas urpaqqa sanaly tárbıe berý jolyndaǵy eńbegi úshin «Qurmet» ordeni tabystaldy.
Al 1990 jyldan bastap gazet ataýy «Qazaqstan pıonerinen» «Ulan» bolyp ózgerdi.
Gazetti ár jyldary Á.Ismaıylov, Á.Ydyrysov, S.Berdiqulov, F.Ońǵarsynova, Ý.Qalıjan, B.Qoıshybaev, Ǵ.Dosken, B.Súleımenov, S.Qalıuly sııaqty qazaqtyń qabyrǵaly qalamgerleri basqardy.
Qazirgi ýaqytta gazettiń bas redaktory – Jadyra Narmahanova.
«Ulannyń» mektebinen ótken kez kelgen oqýshy sol kezdegi ómirge degen balalyq qyzyǵýshylyǵyn joǵaltpas. Búgin sol jas oqyrmannyń barlyǵy derlik bilikti mamanǵa aınalyp, túrli salada aldyńǵy shepte qyzmet etip júr. Sonyń ishinde «Ulan» qalam ustaǵan talaı jasty jazýǵa baýlyp, birneshe býyn qazaq jýrnalıstıkasynyń maıtalmandaryna jol ashty.
Bıyl 90 jyldyq mereıtoıyn atap ótip jatqan balalardyń tól basylymy osy ýaqyt ishinde qansha urpaqtyń sanasyn qalyptastyryp, dúnıetanymyn keńeıtti. Olardyń rýhanı, mádenı damýynda úlken ról atqardy.
Basylymnyń týǵan kúnine oraı Qazaqstan Respýblıkasynyń Ulttyq kitaphanasy arnaıy kórme uıymdastyryp jatyr.
