Atalmysh salanyń beldi mamany Nazgúl Oljabaıqyzynyń aldyna búgin de birneshe adam kelip otyr. Ony jerge ornalastyrýshy maman ǵana emes, ujym medıatory dese de bolǵandaı. Sebebi, jer paıdalanýshylardyń jer qatynastarynda týyndaı qalǵan keıbirmáselelerin sotqa jetkizbeı sheshý úshin de tájirıbeli de bilimdi mamannyń keńesi qajet. Mine, sondaı keńesti alý úshin áriptesteri men jer paıdalanýshylar Nazgúl Oljabaıqyzyna júginedi.
«Is tetigi bilikti maman qolynda» ekeni beseneden belgili. О́z kəsibiniń qyr-syryn jetik meńgergen Nazgúl Tompaqova bilimdi de bilikti maman retinde tanyla bilip, laýazym bıigine satylaı kóterildi. Salaǵa osydan 17 jyl buryn kelip, Jumysyn ınspektorlyqtan bastaǵan ol, búginde basqarma basshysynyń orynbasaryna deıingi satylardan ótti.
Árıne, qyzmet joǵarylaǵan saıyn qoıylar talap, júkteler mindet, atqarar sharýa da aýqymdy bolary zańdylyq. Eńbek, tek adal eńbek qana abyroıǵa jetkizetinin jas kezinen-aq kóńiline toqyp, kókeıine túıip ósken Nazgúl, ózine senip tapsyrylǵan osynaý mindetti úlken jaýapkershilikpen eńserip keledi. Jerdi paıdalaný men qorǵaýdy uıymdastyrýǵa baǵyttalǵan is-sharalar, jer paıdalanýshylardyń aqparattaryn bazaǵa engizý, jer ýchaskesine menshik quqyǵyna jáne jer paıdalaný quqyǵyna qujattar daıyndaý, olardyń der kezinde oryndalýyn jiti baqylaýda ustaý úlken jaýapkershilik pen biliktilikti talap etedi.
Jumys jelisi naqty sıfrlarǵa negizdelgendikten, qyrandaı qyraǵy, saýysqandaı saq bolýdyń mańyzy zor. Oǵan qosa zaman talabyna saı jańa baǵdarlamalardy ıgerip, jumys tıimdiligi men sapasyn arttyrý mindetin de basty nazarda ustaıdy.
«Osyndaı jaýapty qyzmettiń aýyr júgin arqalaı júrip, Nazgúl Oljabaıqyzy boıyna bitken adamgershilik asyl qasıetterden esh aınymaı, jas mamandarǵa bilgenin úıretip, tálimdi tálimger retinde qamqorlyq tanytyp otyrady. Dana halqymyz «Almas qanjardy jumsaq qaıraqqa qaıraıdy», «túsi jylydan túńilme» dep tegin aıtpaǵan. Tabıǵatynan kishipeıil, júzinen shýaq shashyp kúlimsirep júretin Nazgúl Oljabaıqyzy baıypty da baısaldy minezi men jumystaǵy tabandylyǵynyń arqasynda óz ortasyna syıly, ujymynda zor qurmetke ıe. Ulaǵatty jannyń el ıgiligi jolyndaǵy atqarǵan eńbegi de eleýsiz emes. 2007 jyly Jer qatynastary basqarmasynyń, 2019 jyly «Azamattarǵa arnalǵan úkimet» MK KEAQ Qurmet gramotalaryna ıe bolýy eseli eńbektiń jemisi», deıdi ujym qyzmetkerleri.
«Nazgúl bizdiń maqtanyshymyz. Ujymdaǵy áriptesterdiń bári de Nazgúlge qurmetpen qarap, tájirıbesinen, isinen úlgi alady. Qyzmet alýshylardyń alǵystary men aq batasy qanshama!», – deıdi «Azamattarǵa arnalǵan úkimet» MK Almaty qalalyq fılıly Jer kadastry basqarmasy basshysynyń orynbasary Altaı Nurqanuly.
«Ana – úıdiń berekesi, bala – úıdiń merekesi» degen ǵıbratty sóz bar. Sol aıtpaqshy, Nazgúl Oljabaıqyzy bilikti maman ǵana emes, eń bastysy úıdiń de, túzdiń de sharýasyn bir kisideı dóńgeletip júrgen aıaýly ana. Endi táı-táı basyp júrgen sábıi – Rahymjan, jumystaǵy sharshaǵanyn basatyn kóz qýanyshy, ómiriniń jalǵasy. «Onyń árbir qadamy men byldyrlaǵan tili – meniń dárýmenim» deıdi júregi meıirimge tolǵan Nazgúl ana.
ALMATY
