Almaty oblysyndaǵy «Ile» polıgonynda ótkizilgen «Dala qyrany-2013» halyqaralyq áskerı bitimgershilik oqý-jattyǵý sharasy óz mejesine kelip jetti. Qazaqstan, AQSh, Ulybrıtanııa, Lıtva, Shveısarııa, Italııa, Qyrǵyzstan, Tájikstan memleketteri Qarýly kúshteriniń ókilderi birlesip beıbitshilikti saqtaý maqsatynda kúni-túni belsendi túrde áskerı operasııalar ótkizdi.
Almaty oblysyndaǵy «Ile» polıgonynda ótkizilgen «Dala qyrany-2013» halyqaralyq áskerı bitimgershilik oqý-jattyǵý sharasy óz mejesine kelip jetti. Qazaqstan, AQSh, Ulybrıtanııa, Lıtva, Shveısarııa, Italııa, Qyrǵyzstan, Tájikstan memleketteri Qarýly kúshteriniń ókilderi birlesip beıbitshilikti saqtaý maqsatynda kúni-túni belsendi túrde áskerı operasııalar ótkizdi.
Bitimgershilik oqý-jattyǵýynyń belsendi kezeńin qorytyndylaý barysynda birikken áskerler jeke adamdardy jáne kólikterdi tekserý, taktıkalyq operatıvtik ortalyqtyń qyzmetin uıymdastyrý, jergilikti nysandardy kúzetý isin júrgizý, tikushaq arqyly tolyq baqylaý sharasyn meńgerý jáne shabýyl jasalǵan nysannyń ahýalyn anyqtaý sekildi negizgi tapsyrmalardy oryndady.
Oqý-jattyǵý sharasynyń baǵdarlamasyna sáıkes Birikken bitimgerler shtabynda baqylaýǵa alynǵan aımaqtyń kartasy jasalyp, yqtımal dushpandar ornalasqan jerler anyqtaldy. Árbir topqa naqty tapsyrmalar berilip, «Qazbat» desant-shabýyldaýshylarynyń jeke quramy aǵa leıtenant B.Aqtanovtyń jetekshiligimen kólik quraldaryn jáne adamdardy muqııat tekserýden ótkizdi. Dushpandar basyp alǵan aýyl mańyna túsirilgen 25 jaýyngerden turatyn utqyr top tez arada úıler men joldyń qaltarysyna qoıylǵan jarylǵysh zatty anyqtap, arnaıy kıim kıgen saperdiń kómegimen ony aýlaqqa aparyp zalalsyzdandyrdy. BTR-80 jáne Hammer áskerı avtokólikteri jetkizgen qarýly top jaý bekinisine shabýyl jasap, jaraly áskerılerdi ot oshaǵynan alyp shyqty. Áýede eki tikushaq maıdan dalasyn jiti baqylap, bitimgerler ortalyǵyna aqparat berýmen qatar, basqynshylar ornalasqan bekiniske áýeden oq jaýdyrdy.
Bul kezde batalon shtabyndaǵy ofıserlerdiń de jumysy qyzý júrgizilip, operatıvti bólimniń bastyǵy, kapıtan A.Ámirenov tehnıkalyq jáne mýltımedııalyq quraldardyń kómegimen taktıkalyq jaǵdaıdy sheber basqaryp otyrdy. Budan keıin bitimgerler gýmanıtarlyq júk tıelgen kolonna ótetin kópirdi aeroutqyr áskerlerdiń jáne áýe zvenosynyń kómegimen baqylaýǵa aldy. Munda da jaýdyń qoıǵan jarylǵysh zattary tabylyp, júk máshınelerine jasalǵan lańkestik shabýyl toıtaryldy. Bitimgerlerdiń jınaqylyǵy men jedel áreket etýiniń nátıjesinde gýmanıtarlyq júk eldi mekenge ýaqtyly jetkizilip, ortalyqtyń tapsyrmasy tap-tuınaqtaı oryndaldy.
Árıne, bul oqý-jattyǵý operasııasy. Alaıda, osyndaı birlesken áskerı qımyldar sheberlikti shyńdaı túseri anyq.
«Ile» polıgonynda osymen onynshy márte ótkizilip otyrǵan «Dala qyrany» taktıkalyq-arnaıy bitimgershilik oqý-jattyǵýy Qazaqstan Respýblıkasy men NATO arasyndaǵy áriptestik qımyldarynyń derbes josparyn júzege asyrý, sonymen qatar, «Beıbitshilik úshin áriptestik» baǵdarlamasy sheńberinde ótkizilip kele jatqanyn taǵy da eske salǵymyz keledi. Bıylǵy oqý-jattyǵýǵa Qazaqstan, AQSh, Ulybrıtanııa, Lıtva, Shveısarııa, Italııa, Qyrǵyzstan, Tájikstan memleketteri Qarýly Kúshteriniń ókilderi qatyssa, áskerı jattyǵýlardyń barysyn NATO-men birlesip Ispanııa, Germanııa jáne Belarýs Respýblıkasynyń baqylaýshylary qadaǵalady.
Jattyǵýǵa Qazaqstan tarapynan «Qazbat» bitimgershilik batalony tolyq quramda, «Qazbrıg» bitimgershilik brıgadasynyń shtaby jáne Qazaqstan Qarýly Kúshteri Aeroutqyr áskerleri qolbasshysy basqarmasynyń áskerı qyzmetshileri men Qurlyq áskerleri jáne Áýe qorǵanysy kúshteriniń bólimsheleri qatysty.
Qanat ESKENDIR,
«Egemen Qazaqstan».
ALMATY.
Sýretterdi túsirgen
Iýrıı BEKKER.
