Eki boksshy arasyndaǵy alǵashqy kezdesý 2018 jyldyń jeltoqsan aıynda Los-Anjeleste ótip, alyptar aıqasy teń aıaqtalǵan-dy. Ekinshi jekpe-jek osy jyldyń 22 aqpanynda Las-Vegasta uıymdastyryldy. Bul aıqasta baǵy men baby kelisken brıtanııalyq boksshy Taıson Fıýrı qarsylasynan basym tústi. Kezdesýdiń 8-raýndynda Fıýrı Ýaılderdi tehnıkalyq nokaýtpen jeńip, WBC tujyrymy boıynsha álem chempıony atanǵan-dy. Amerıkalyq bul beldigin 10 jekpe-jekten beri eshkimge bermeı, sátti qorǵap kele jatqan bolatyn.
Maık Koppındjerdiń jazýynsha, úshinshi jekpe-jekte Ýaılderdiń gonorary 40 paıyz, Fıýrıdiki 60 paıyzdy quraıdy. Aıta keteıik, buǵan deıin eki boksshy arasyndaǵy revansh aıqasy 18 maýsymda ótedi dep habarlanǵan-dy. Biraq koronavırýs pandemııasyna baılanysty jekpe-jek qazan aıyna aýystyryldy.
