Karantın talaptaryna sáıkes tranzıttik júk kólikteri men tamaq ónimderi bar kólik quraldaryn qospaǵanda, barlyq kólik quraldary men azamattardyń Aqmola oblysyna kirip-shyǵýyna tyıym salynady. Azyq-túlik dúkenderi men dárihanalardan basqa iri saýda ortalyqtary, saıabaqtar, monsha keshenderi, sanatorııalyq-kýrorttyq mekemeler, sulýlyq salondary, shashtarazdar, avtomobıl, turmystyq zattar men qurylys bazarlary, sondaı-aq adamdar jappaı jınalatyn basqa da obektiler óz qyzmetterin toqtatady.
Táýlik boıǵy rejımde qyzmet kórsetetin obektilerdi qospaǵanda, qoǵamdyq tamaqtandyrý oryndary da jumys istemeıdi. Dárihanalar men dárihana kıoskileri jumysyn shtattyq rejımde jalǵastyrady. Oblys turǵyndary asa mańyzdy sharýalary bolmasa úılerinen shyqpaýy kerek. Azamattar maska men birjolǵy qolǵap kıip, qoldaryn antıseptıkpen tazalap otyrýy tıis. 65 jastan asqan azamattar ózin-ózi oqshaýlaý arqyly rejımdi saqtasyn.
Jalpy, oblysta tıisti qyzmetterdiń karantın rejıminde jumys isteý daıyndyǵy qamtamasyz etildi. Jergilikti atqarýshy organdardyń, aýmaqtyq qorǵanys brıgadasynyń jáne jergilikti áskerı basqarý organdarynyń áskerı mindettilerdi shaqyrýǵa daıyndyǵy qamtamasyz etildi.
Oblys shekarasyna kireberis joldarda 8 blok-post, al oblys ortalyǵynyń shekarasyna 12 blok-post ornatý josparlanýda. Krımınogendik jáne qoǵamdyq-saıası jaǵdaı kúrdelengen jaǵdaıǵa arnaıy jedel josparlar, sondaı-aq polısııa departamentiniń jıyntyq jasaǵy men Ulttyq ulannyń 5510 áskerı bólimi qyzmetshileri daıyndyqqa keltirildi. Árıne, osy sharalardyń barlyǵy tosyn. Keı jaǵdaıda azamattarymyzdyń quqyqtaryn shekteletindigi sózsiz. Alaıda qazir indettiń jyldam taralýy osyndaı jaıǵa májbúr etip otyr. Búgingi is-qımyldardyń barlyǵy koronavırýs ınfeksııasynyń taralýyna jol bermeýge jáne oblys turǵyndarynyń densaýlyǵyn saqtaýǵa baǵyttalǵan.
Mamandardyń málimdeýine qaraǵanda, Elorda mańy, atap aıtqanda oblys aýmaǵyna ınfeksııa taratýdyń oshaǵy bolyp tabylatyn Selınograd aýdany erekshe alańdatýshylyq týǵyzýda.
