«Petropavl qalasynyń aınalasyna basty baǵyttar boıynsha blok postar qoıylady. Shyǵý men kirýge tek qana mańyzdy qajettilik bolǵan jaǵdaıda ǵana ruqsat beriledi. Sonymen qatar qujattar ǵana tekserilmeıdi, sanıtarlyq jáne veterınarlyq qyzmetter saýalnama da júrgizetin bolady. Blokpostardyń negizgi mindeti júrip-turýdy shekteý. Tek jumysqa, aýrýhanaǵa nemese iskerlik máselelermen ǵana júrýge bolady», dedi ákim. Odan ári Q.Aqsaqalov barlyq aýdandarda da blokpostar qoıylatynyn eskertti. Barlyq otbasylyq saltanattar, toılar TJ ýaqytynda bolmaı, keıinge shegeriledi. Qalanyń áýejaıy qazirdiń ózinde jabylǵan. Temirjol bıletterin satý toqtatylǵan. Vokzal tek 27 naýryzǵa deıin bılet alǵan jolaýshylardy ǵana qabyldaıtyn bolady. «Bul sharalar eskertpeler emes, TJ baılanysty talaptar. Sondyqtan ol sózsiz oryndalýy kerek. Polısııa osy talaptardyń oryndalýyn qatty qadaǵalaıtyn bolady», deı kelip odan ári Qumar Irgebaıuly: «Adamdar neǵurlym qoǵamdyq oryndarda kóbirek bolsa, solǵurlym indetke ushyraý qaýpi zor», dep eskertti.
Oblystaǵy barlyq balabaqshalar jabylatyn bolǵan, 65-ten asqan jasy ulǵaıǵan azamattardyń bárine úıden shyqpaý qajettigi eskertilgen. Qoǵamdyq oryndarda úsh adam jınalǵannyń ózinde bir-birine jaqyndaýy eki metrden kem bolmaýy kerek. Memlekettik mekemeler, quqyq qorǵaý organdary, aýrýhanalar, kommýnaldyq qyzmetter qalypty rejimde jumys isteıdi. Qalǵan kásiporyndar men jumys oryndary qyzmetkerlerin múmkindiginshe dıstansııalyq rejimge aýystyrýy kerek. Tamaqtandyrý oryndary, bankter kezekke turatyn klıentteriniń sanyn beseýden asyrmaıtyn jumys kúnderine kóshkeni jón. Olardyń ózara qashyqtyǵy da eki metrden kem bolmaýy qadaǵalansyn. Qoǵamdyq kólik tańǵy saǵat jetiden keshki 20.00 saǵatqa deıin ǵana isteıtin bolady. Dızenfeksııa jasaý jumystary da jıileıdi. Búginnen bastap barlyq qoǵamdyq oryndar dızenfeeksııalanady.
Osy máselelerdiń bárin aıtyp kelip, sóziniń sońynda ákim Prezıdenttiń tapsyrmasyna sáıkes vırýsqa qarsy kúresip jatqan dárigerlerdiń eńbekaqylary ósetinin jetkizdi. Aldymyzdaǵy úsh aı boıy medısına qyzmetkerlerin vırýs juqtyrý táýekeline qaraı úsh topqa bólinedi, sonyń ishinde ınfeksııaly stasıonardyń qyzmetkerlerge eń tómengi eńbekaqy kóleminiń 20 ret eselengen kóleminde, ıaǵnı 850 myń teńge qosymsha tólenedi. Provızorlyq stasıonarlar men «jedel járdem» dárigerlerine 425 myń teńge, al karantınde jumys isteıtin qyzmetkerlerge 212 myń qosymsha aqy tólenedi dedi ol.
Soltústik Qazaqstan oblysy
