1430.kz servısi – pasıentter men dárigerlerge arnalǵan onlaın alań. Ol elimizde telemedısınany damytý boıynsha qolǵa alynǵan Start-Up jobalardyń biri. Respýblıkadaǵy 700-den asa bilikti dáriger qyzmet kórsetetin saıt osy jyldyń qańtar aıynan beri jumys istep keledi. Búginde sıfrlandyrý barlyq salany derlik qamtýda. Medısına salasy da budan qalys qalmaq emes. Ásirese koronavırýstyń taralyp, tótenshe jaǵdaıdyń jarııalanýy sıfrlandyrýdyń mańyzyn odan saıyn arttyra túskeni anyq. Onyń ústine #BizBirgemiz dep urandatqan qaıyrymdy jandardyń da qatary molaıyp, judyryqtaı jumylǵan jurtshylyq qıyndyqty birge eńserýde. 1430.kz saıtyna tirkelgen medısına mamandary da halyqqa tegin qyzmet kórsete bastady.
«Munda turǵyndar emhanaǵa barmastan dárigerdiń keńesin onlaın alady. Kezekte turyp, jol júrip ýaqyt joǵaltpaıdy. Dárigerdiń biliktiligi, sanaty, kórsetiletin qyzmettiń baǵasy jáne basqa da tolyq aqparat 1430.kz paraqshasynda kórsetilgen. Iаǵnı kez kelgen turǵyn ózine qajetti dárigerdi saıtqa tirkelý arqyly tańdaı alady. Onlaın keńes alǵannan keıin pasıentter sol dárigerdiń jeke qabyldaýyna da jazylý múmkindigine ıe bolady. Al kórsetilgen qyzmettiń aqysy tikeleı dárigerlerge tólenedi», degen joba avtory Jandos Baqtybaev mundaǵy dárigerler karantın kezinde tegin medısınalyq keńes bere bastaǵanyn jetkizdi. Onyń aıtýynsha, bul dáriger men pasıentterdiń arasynda baılanys ornatýdyń eń tıimdi ári qaýipsiz joly.
Oftalmolog, pedıatr Raýshan Quljabaeva kúnine 30-ǵa jýyq adamdy onlaın tegin qabyldaıdy. «Ásirese COVID-19 indeti taralǵan osynaý kezde onlaın medısınalyq qyzmettiń artyqshylyǵy da, mańyzdylyǵy da, qolaılylyǵy da, tıimdiligi de orasan zor. Birinshiden, naýqas úıinen shyqpastan dárigerdiń kómegine júgine alady. Ekinshiden, karantın kezinde naýqas ta, dáriger de qashyqtyqty saqtaı otyryp, indettiń ýshyǵýynyń aldyn alady. Úshinshiden, shalǵaı eldimekenderde turatyn halyqqa medısınalyq kómek qoljetimsiz jaǵdaıda, sonymen qatar medısınalyq kómek shuǵyl muqtaj adamdarǵa alǵashqy medısınalyq kómekti osy saıt arqyly kórsetemiz. Munda búkil aımaq boıynsha dárigerler tirkelgen. Zerthanalyq synamalar men aspaptyq taldaýlardy, tekseristerdiń nátıjelerin taldap emdik nusqaýlar jazyp beremiz. Ary qaraı ózimizdiń nemese jaqyn mańyndaǵy dárigerdiń tikeleı qabyldaýyna jazylýyna múmkindik jasaımyz. Sondyqtan men barlyq áriptesterimdi osy servısti paıdalanyp tegin qyzmet kórsetýge shaqyramyn», deıdi R.Quljabaeva.
Jalpy tájirıbelik dáriger Anar Nurbaeva da búginde pasıentterge tegin keńes beredi. Bir ózi kúnine 10-nan asa adamdy onlaın qabyldaıtyn ol qazirgi ýaqytta halyqtyń kópshiligi koronavırýs týraly suraqtardy jıi qoıatynyn aıtady. «Olar kez kelgen ýaqytta bizge jazyla alady jáne jyldam keńes alady», deıdi A.Nurbaeva.
